وقۋ-اعارتۋ ءمينيسترى بالالار كۇنىمەن قۇتتىقتادى، دەپ حابارلايدى Almaty-akshamy.kz.
قادىرمەندى جاس دوستارىم!
سىزدەردى جادىراعان جازدىڭ ەڭ شۋاقتى مەرەكەسى - حالىقارالىق بالالاردى قورعاۋ كۇنىمەن قۇتتىقتايمىن!
بۇگىندە ەلىمىزدە 6،8 ميلليون بالا بار. ونىڭ 3،8 ميلليون — وقۋشىلار. بۇل جاي عانا ستاتيستيكالىق دەرەكتەر ەمەس، بۇل ساننىڭ ارتىندا ەلىمىزدىڭ شىن مانىندە وراسان زور الەۋەتى جاتىر.
بالالارىمىزدىڭ جان-جاقتى دامۋى مەن تابىستى تۇلعا بولىپ قالىپتاسۋىنا جايلى ءارى ءقاۋىپسىز ورتا قالىپتاستىرۋ مەملەكەتتىك ساياساتتىڭ باسىم باعىتى بولىپ قالا بەرەدى.
بيىل ەلىمىزدىڭ «بالا قۇقىقتارى تۋرالى» حالىقارالىق كونۆەنسياعا قول قويىلعانىنا 30 جىل تولادى. وسى ۋاقىت ىشىندە بالالاردىڭ قۇقىقتارىن قورعاۋ سالاسىنداعى بارلىق نەگىزگى حالىقارالىق-قۇقىقتىق قۇجاتتار راتيفيكاسيالاندى. بالالاردىڭ ءال-اۋقاتىنىڭ يندەكسى ازىرلەنىپ، ەنگىزىلدى. بالالاردىڭ وتباسىندا ءومىر ءسۇرۋ جانە تاربيەلەنۋ قۇقىقتارى قامتاماسىز ەتىلۋدە. بالالارىمىزدىڭ ءال-اۋقاتى ەلىمىزدىڭ تۇراقتى دامۋى مەن جارقىن بولاشاعىنىڭ ىرگەتاسى.
سىزدەرگە زور دەنساۋلىق، مول تابىس جانە جازدىق كانيكۋلداعى دەمالىستارىڭىز ءقاۋىپسىز، مازمۇندى دا قىزىققا تولى بولۋىن تىلەيمىن. بۇگىنگى مەرەكە كۇنى قۇتتى بولسىن!