ينفلياسيالىق پروسەستەر كۇشەيە ءتۇستى.
ۇكىمەتتىڭ كەڭەيتىلگەن وتىرىسىندا ق ر ۇلتتىق بانكىنىڭ باسقارما ءتوراعاسى عالىمجان ءپىرماتوۆ ينفلياسيانىڭ ارتۋىنا سەبەپ بولىپ وتىرعان نەگىزگى فاكتورلارعا توقتالدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«2022 جىلعى قازاقستاننىڭ ەكونوميكاسى مەن قارجى سەكتورى بۇرىن-سوڭدى بولماعان وزگەرىستەر مەن اسا جوعارى بەلگىسىزدىك جاعدايىندا دامىدى. ەنەرگيا، ازىق-تۇلىك پەن شيكىزات تاۋارلارىنىڭ الەمدىك باعاسىنىڭ ايتارلىقتاي وسۋىمەن قاتار تاۋار جەتكىزۋ جولدارىنىڭ بۇزىلۋى ينفلياسيالىق پروسەستەردى كۇشەيتە ءتۇستى»، - دەدى عالىمجان ءپىرماتوۆ.
ونىڭ پايىمىنشا، ينفلياسيالىق قىسىمنىڭ ءوسۋى الەمدەگى ورتالىق بانكتەردىڭ اقشا-كرەديت تالاپتارىنىڭ تەز ءارى سينحروندى تۇردە قاتاڭداۋىن تۋىنداتقان.
«اقش فەدەرالدىق رەزەرۆتىك جۇيەسىنىڭ مولشەرلەمەنى اگرەسسيۆتى تۇردە كوتەرۋى دامۋشى ەلدەردىڭ ۆاليۋتالارىنا قىسىم جاساپ، دوللاردىڭ سوڭعى 20 جىلداعى ەڭ جوعارى دەڭگەيگە نىعايۋىنا الىپ كەلدى»، - دەدى ۇلتتىق بانك باسشىسى.
ايتا كەتەيىك، بۇگىن مەملەكەت باسشىسى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.
جيىن بارىسىندا ەلىمىزدىڭ بيىلعى الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى تۋرالى ەسەپ بەرىلەدى جانە ۇكىمەتتىڭ 2023 جىلعا ارنالعان جۇمىس جوسپارى قاراستىرىلادى دەپ جوسپارلانىپ وتىر.