بيىلدان باستاپ 5 مىڭنان استام عالىم لايىقتى ءارى تۇراقتى جالاقى الادى.
ق ر ءبىلىم جانە عىلىم مينيسترلىگىنىڭ اقپاراتىنا سايكەس، عالىمداردىڭ جالاقىسى بۇرىن 152 مىڭ تەڭگە بولسا، ەندى ول 257 مىڭ تەڭگەگە ءوسىپ، 1،5 ميلليون تەڭگەگە دەيىن وزگەرىپ وتىرادى، دەپ حابارلايدى Almaty-akshamy.kz
«پرەزيدەنت بىلتىر ءتيىستى تاپسىرما بەرىپ، تەز ارادا زاڭعا وزگەرىس ەنگىزۋ كەرەك دەگەننەن كەيىن 2،5 ايدا ءتيىستى زاڭ جوباسىن دايىنداپ، مەملەكەت باسشىسى 15 قاراشادا ءتيىستى قۇجاتقا قول قويدى. ناتيجەسىندە 1 200 عالىم بيىلدان باستاپ اي سايىن، كونكۋرستان تىس، تۇراقتى ايلىق الاتىن بولادى. ول 74 عىلىمي ۇيىم 10 مەملەكەتتىك ورگانعا تيەسىلى. سونىمەن قاتار ىرگەلى زەرتتەۋلەرمەن اينالىساتىن ينستيتۋتتاردىڭ 100 پايىز شتاتتىق قۇرىلىمى جالاقىسىن دا الادى، عىلىمي جۇمىسقا قاجەتتى قارجىلاندىرۋدى دا الادى، ساتىپ الاتىن قوندىرعىلارعا دا قاراجات بولىنگەن. بۇل كەمىندە 4 مىڭ عالىمعا قاتىستى. سوندا ءقازىر 5 مىڭنان استام عالىم اي سايىن تۇراقتى، مولشەرى دە ءومىر سۇرۋگە جەتكىلىكتى جالاقى الادى»، - دەدى ق ر ءبىلىم جانە عىلىم مينيسترلىگى عىلىم كوميتەتىنىڭ ءتوراعاسى جاننا قۇرمانعالييەۆا.
ءبىلىم جانە عىلىم مينيسترىگىنىڭ باسپا ءسوز قىزمەتى ۇسىنعان دەرەك بويىنشا، قازاقستاندا عالىمداردىڭ ورتاشا جالاقىسى وسكەن.
«بۇرىن 152 مىڭ تەڭگە بولسا، ەندى ول 257 مىڭ تەڭگەگە ءوسىپ، 1،5 ميلليون تەڭگەگە دەيىن وزگەرىپ وتىرادى. بۇرىن عالىمداردىڭ جالاقىسى تۇراقسىز بولىپ، كونكۋرستاردىڭ ناتيجەلەرىنە بايلانىستى بولاتىن. ەندى قابىلدانعان زاڭنامالىق تۇزەتۋلەردىڭ ارقاسىندا جەتەكشى عالىمداردىڭ (1 200 ادام) جالاقىسى بازالىق قارجىلاندىرۋعا قوسىلدى. بۇل رەتتە عالىمدارعا تولەنەتىن قوسىمشا اۆتورلىق سىياقىنىڭ جالپى سوماسى 338 ملن تەڭگەگە تەڭ. ال يننوۆاسيالىق جوبالاردى ساتۋدان تۇسكەن تابىس 16،3 ملرد تەڭگەنى قۇرادى»، - دەلىنگەن مينيسترلىك تاراتقان مالىمەتتە.