تىڭ تەحنولوگيانىڭ ارقاسىندا سىرتقا ساتىلاتىن مەتاللۋرگيالىق ءونىمنىڭ بۇل تۇرىنە دەگەن سۇرانىس ارتا تۇسپەك.
سايكەسىنشە، باعاسى 15 ەسە قىمباتتاماق. ءقازىردىڭ وزىندە قۇرامى تازا سەلەن ءوندىرۋ جۇمىسى باستالىپ، ءىرى كاسىپورىنداردا ارنايى سەحتار اشىلىپ جاتىر، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
سەلەن مەديسينا، شىنى ءوندىرىسى جانە ەلەكترونيكا سىندى ماڭىزدى سالالاردا كەڭىنەن قولدانىلادى. سوندىقتان دا وعان دەگەن سۇرانىس جوعارى. دەسە دە، وسى كەزگە دەيىن ەلىمىزدە ءوندىرىلىپ كەلگەن مەتالدىڭ بۇل ءتۇرى قۇرامى جاعىنان تازا بولمايتىن. 20 جىلدىق زەرتتەۋ جۇمىستارىنان كەيىن ساتپايەۆ ۋنيۆەرسيتەتىنىڭ عالىمدارى جاڭالىق اشتى. ولار بالقىتىلعان مىس قالدىقتارىنان قۇرامى تازا سەلەن الۋدىڭ جولىن تاپتى.
«ءبىزدىڭ تەحنولوگيا بويىنشا 80 پايىزدىق لاس سەلەننەن ءبىزدىڭ ۆاكۋمدىق پەشىمىز ارقىلى سەلەندى عانا ۇشىرىپ الىپ، ونى كونۆەنسيروۆات ەتىپ 99،5 پروسەنتكە دەيىن كوتەرەمىز. ءسويتىپ سەلەندى الامىز. ال قالعان مەتالدار – التىنى بار، كۇمىسى بار، ول تومەن قاراي ءتۇسىپ كەتەدى»، - دەيدى ساتبايەۆ ۋنيۆەرسيتەتى مەتاللۋرگيا جانە كەن بايىتۋ ينستيتۋتىنىڭ باس ديرەكتورى باعداۋلەت كەنجەالييەۆ.
قازاقستان سەلەننىڭ كەلىسىن سىرتقا 8 دوللاردان ساۋدالايدى. ەندى جاڭا تەحنولوگيانىڭ ارقاسىندا باعاسى 15 ەسەگە دەيىن ءوسۋى مۇمكىن. ويتكەنى قۇرامى 99 پايىزعا تازارعان مەتاللعا سۇرانىس جوعارى.
جاڭالىق اشقان عالىمداردىڭ ايتۋىنشا، بۇل جەتىستىككە مەملەكەت باسشىسى قاسىم-جومارت توقايەۆتىڭ قوسقان ۇلەسى زور. ويتكەنى، بۇرىنعى عىلىم جانە ءبىلىم مينيسترلىگى ەكىگە ءبولىنىپ، عىلىم جانە جوعارى ءبىلىم مينيسترىلىگى قۇرىلعالى عىلىمعا ۇلكەن كوڭىل ءبولىنىپ، عالىمداردىڭ جۇمىسى جاندانعان. ءتىپتى سەلەن ءوندىرۋدىڭ تىڭ تەحنولوگياسىن ءىرى كومپانيالار وزدەرىندە قولدانىپ، جاڭا سەحتار اشىپ جاتىر.
«ءبىز ۇزاق ۋاقىت مىس قالدىقتارى مەن ساپاسى تومەن سەلەندى قالاي پايداعا اسىرارىمىزدى بىلمەي جۇرگەنبىز. جاڭا تەحنولگيانىڭ ارقاسىندا بۇل پروبلەما شەشىلدى. بىزدەگى سەح جىلىنا 75 تونناعا دەيىن ءونىم شىعارا الادى. ءتىپتى، وزگە كاسىپورىنداردا شىعارىلعان ساپاسى تومەن سەلەندى قايتا وڭدەۋگە قاۋقارلى»، - دەيدى قازاقمىس پروگرەسس كومپانياسىنىڭ ديرەكتورى الەكساندر شاحالوۆ.
مامانداردىڭ ايتۋىنشا، جاڭادان اشىلعان سەح 100 ادامدى جۇمىسپەن قامتۋعا مۇمكىندىك بەرەدى. ايتا كەتۋ كەرەك، بۇعان دەيىن وتاندىق عالىمدار 1 ملن تەڭگەدەن استام جالاقى الىپ كەلسە، ەندى جوبالارى مەن تەحنولوگيالارىن كاسىپورىندارعا ەنگىزۋ ارقىلى ولاردىڭ ەڭبەكاقىسى 6-7 ملن تەڭگەگە دەيىن وسەدى.