«Nomad Stunts» قازاقستاندىق كومانداسىنىڭ كاسكادەرى عالىمبەك قاراتۇرىك ءۇندىستانداعى كينوفەستيۆالدە ءبىرىنشى ورىندى يەلەندى، دەپ حابارلايدى اlmaty-akshamy.kz.
ءۇندىستاندا ءوتىپ جاتقان «اتۆيكۆارۋني» حالىقارالىق بايقاۋىنا الەمنىڭ تۇكپىر-تۇكپىرىنەن 240-تان استام كينو قاتىستى. ال وسىنشاما فيلم اراسىنان وتانداسىمىزدىڭ لەنتاسى «ۇزدىك شەتەلدىك فيلم» نوميناسياسى بويىنشا جەڭىمپاز اتاندى.
كينوفەستيۆالدە ۇسىنىلعان كارتينا عالىمبەك قاراتۇرىكتىڭ ناعىز تۋىندىسى. ول تۇسىرىلگەن ءفيلمنىڭ رەجيسسەرى ءارى رولدەردىڭ بىرىندە وينادى. وسىلايشا كاسكادەردىڭ ناعىز شەبەرلىگىن كوپشىلىككە پاش ەتتى.
ول ءقازىر ەلىمىزدەگى ۇلتتىق ونەر ۋنيۆەرسيتەتىنىڭ ستۋدەنتتەرىنە ءوزىنىڭ باي تاجىريبەسىمەن بولىسۋدە. ول جاقىن ارادا بىرنەشە قىسقامەتراجدى جانە تولىقمەتراجدى فيلمدەر شىعارۋدى جوسپارلاپ وتىر.
«كاسىبي دەڭگەيىمدى تەكسەرۋ، سونداي-اق ونى ودان ءارى دامىتا ءتۇسۋ ماقساتىندا حالىقارالىق كينوفەستيۆالگە قاتىستىم. مەن ءۇشىن بۇل ءساتتى جوبا بولدى دەپ ايتا الامىن. فيلم تۋرالى ايتاتىن بولساق، ءار حالىقتىڭ «كۇڭگىرت جارىق» فيلوسوفياسى بار»، - دەيدى عالىمبەك قاراتۇرىك.
ونىڭ پىكىرىنشە، ءبىزدىڭ حالقىمىزدىڭ فيلوسوفياسى تابيعاتپەن ەتەنە بايلانىسىپ جاتۋىندا ەكەنىن ءفيلمنىڭ سەناريي اۆتورى جانە رەجيسسەرى رەتىندە ايتىپ ءوتتى.
«بۇل كارتيناعا مەن 7 جىل بويى جۇمىس ىستەپ كەلە جاتقان «Nomad Stunts» حالىقارالىق جوباسىنىڭ كاسكادەرلەرى دە قاتىستى»، - دەپ اتاپ ءوتتى عالىمبەك قاراتۇرىك.
ايتا كەتۋ كەرەك، قازاقستاندىق كاسكادەرلىك توپ الەمدەگى ەڭ ۇزدىكتەردىڭ ءبىرى بولىپ تانىلدى. «توميريس» فيلمىندەگى تريۋكتەرى ءۇشىن «Nomad Stunts» «تاۋرۋس» سىيلىعىنا يە بولدى. بۇل بەدەلدى ماراپات كاسكادەرلىك «وسكار» دەپ اتالادى.