ءازىربايجان استاناسى باكۋدەن ءسۇيىنشى حابار جەتتى!
ادەبي سىيلىقتى تابىستاۋ سالتاناتى ءازىربايجان رەسپۋبليكاسى ۇلتتىق عىلىم اكادەمياسىنىڭ زالىندا ءوتتى.
اباي اتىنداعى مەملەكەتتىك سىيلىقتىڭ يەگەرى عالىم جايلىباي تۇركيا رەسپۋبليكاسى اتاتۇرىك اتىنداعى مادەنيەت، ءتىل جانە تاريح جوعارعى مەكەمەسى مەن تۇرىك ءتىل قاۋىمداستىعى تۇركى الەمىنە ورتاق مادەني قۇندىلىقتاردى ناسيحاتتاۋ ماقساتىندا ۇيىمداستىرعان «ءتىل مەيرامى» باعدارلاماسى اياسىندا «تۇرىك بىرلىگى» ادەبي سىيلىعىنىڭ لاۋرەاتى اتاندى، دەپ حابارلايدى Almaty-akshamy.kz.
بۇل – تۇركى الەمىنىڭ ەڭ جوعارعى ادەبي سىيلىعى!
«مارتەبەلى سىيلىقتى تۇرىك ءتىلى قاۋىمداستىعىنىڭ پرەزيدەنتى وسمان مەرت تابىستادى. تۇڭعىش رەت ۇيىمداستىرىلعان حالىقارالىق بايقاۋدىڭ ۇزدىكتەرى قاتارىندا ءازىربايجان اقىنى سابير ريۋستەمحانلي، قىرعىزستان شايىرى ايدا ەگەمبەردييەۆا، وزبەكستاننان ۋلۋگبەك حامداموۆ جانە سولتۇستىك كيپر تۇرىك رەسپۋبليكاسىنان وكتاي وكسيۋزوگلۋ بار. تۇتاس تۇركى الەمىنەن ات وزدىرعان بەس اقىننىڭ قاتارىندا ارقانىڭ اي تاڭبالى ارعىماعى عالىم اعامىزدىڭ بولۋى – بۇكىل قازاق ەلىنىڭ مەرەيى»، - دەپ نۇرگۇل شامايەۆا ءوزىنىڭ الەۋمەتتىك جەلىسى ارقىلى قۋانىشتى جاڭالىقپەن ءبولىستى.
جەڭىمپازدار حالىقارالىق شىعارماشىلىق ۇيىمدار مەن مەكەمەلەردىڭ ۇسىنىسى مەن باعالاۋى نەگىزىندە انىقتالىپ، بارلىق ۇمىتكەرلەردىڭ شىعارمالارى الدىن-الا تۇرىك تىلىنە اۋدارىلىپ، جيناق بولىپ شىققان ەكەن.