قازاقستاننىڭ 1432 اۋىلىندا ءموبيلدى ينتەرنەت جوق. بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسحات ورازبەك ايتىپ بەردى، دەپ حابارلايدى اlmaty-akshamy.kz.
مينيسترلىك اتاپ وتكەندەي، 2023 جىلعى 1 قاڭتارداعى جاعداي بويىنشا ەلدە 6 406 ەلدى مەكەن بار، ونىڭ 6 290-ى اۋىل مارتەبەسىنە يە.
قازىرگى ۋاقىتتا 116 قالا مەن 4 858 اۋىل 3G (2 813 اۋىل) جانە 4G (2 045 اۋىل) ءموبيلدى تەحنولوگيالارى بويىنشا ينتەرنەتكە قول جەتكىزىپ وتىر. سونداي-اق ADSL تەحنولوگياسى بويىنشا ينتەرنەتپەن 1 950 اۋىل جانە تالشىقتى-وپتيكالىق بايلانىس جەلىلەرى تەحنولوگياسىمەن 2 606 اۋىل قامتاماسىز ەتىلدى.
«بۇگىنگى تاڭدا ءموبيلدى ينتەرنەتسىز 1432 اۋىل قالىپ وتىر، ونىڭ ىشىندە 504 اۋىلدى 2023 جىلدان باستاپ سپۋتنيكتىك جۇيەلەر ارقىلى قامتاماسىز ەتۋ ماسەلەسى پىسىقتالۋدا»، - دەدى سەناتتىڭ قارجى جانە بيۋدجەت كوميتەتىندە وتكەن وتىرىسىندا اسحات ورازبەك.
ۆيسە-مينيستر ۇكىمەتتىڭ «قولجەتىمدى ينتەرنەت» ۇلتتىق جوباسىن بەكىتكەنىن، ونىڭ اياسىندا 2024-2027 جىلدارى تالشىقتى-وپتيكالىق بايلانىس جەلىلەرى ارقىلى 3 مىڭنان استام اۋىلدى، ونىڭ ىشىندە ءموبيلدى ينتەرنەتى جوق 928 اۋىلدى ينتەرنەتپەن قامتۋ جوسپارلانعانىن اتاپ ءوتتى. جالپى ۇلتتىق جوبانى ىسكە اسىرۋ ءۇشىن 1 499،9 ملرد تەڭگە قاراستىرىلعان.