گايتي مەملەكەتى بىرىككەن ۇلتتار ۇيىمىنان كومەك سۇرادى

لاتىن امەريكاسىنىڭ ەڭ كەدەي ەلىندە ينفلياسيا ءورشىپ تۇر.

گايتي مەملەكەتى بىرىككەن ۇلتتار ۇيىمىنان كومەك سۇرادى، دەپ حابارلايدى Almaty-akshamy.kz Egemen.kz سايتىنا سىلتەمە جاساپ.

بۇگىندە لاتىن امەريكاسىنىڭ ەڭ كەدەي ەلىندە ينفلياسيا ءورشىپ، ازىق-تۇلىك پەن جانارماي باعاسى قىمباتتاعان. بۇعان قوسا، قىلمىستىڭ كوبەيۋى، حالىقتىڭ نارازىلىعى مەن تىرىسقاق اۋرۋىنىڭ كەڭ تارالۋى جاعدايدى ۋشىقتىرىپ جىبەردى.

گايتي سىرتقى ىستەر ءمينيسترى گۋمانيتارلىق داعدارىستى توقتاتىپ، قالىپتى جاعدايعا ورالۋ ءۇشىن ونىڭ حالقىنا بۇۇ سىندى «مىقتى قولداۋ» قاجەت ەكەنىن ايتتى. الايدا بىرىككەن ۇلتتار ۇيىمىندا گايتيگە كومەك كورسەتۋگە قاتىستى قارسى تاراپتار بار.

جالپى، كومەك يدەياسىن مەكسيكا مەن اقش ۇسىنعان ەدى. ال، رەسەي مەن جۇڭگو اسىعىس شەشىم شىعارماۋعا شاقىردى. ءبىراق گايتيدىڭ سىرتقى ىستەر ءمينيسترى بۇۇ-دان ناقتى كومەك سۇراپ وتىر.

«ماعان اسا جاۋاپتى ميسسيا جۇكتەلدى. زارداپ شەككەن بارلىق ادامنىڭ قايعى-قاسىرەتىن قاۋىپسىزدىك كەڭەسىنە جەتكىزۋىم كەرەك. بۇگىندە گايتي حالقى ءومىر ءسۇرىپ جاتقان جوق، ولار تەك ءتىرى قالۋعا تىرىسىپ ءجۇر»،- دەدى گايتيدىڭ سىرتقى ىستەر ءمينيسترى جان ۆيكتور گەنەۋس.