فۋتزالدان ءاچ: قازاقستان قۇراماسى ىرىكتەۋ ساتىسىنىڭ كەلەسى كەزەڭىنە ءوتتى

العاشقى ويىندا قازاقستاندىق فۋتزالشىلار 2:0 ەسەبىمەن جەڭىسكە جەتتى

فۋتزالدان قازاقستان قۇراماسى بۇگىن الەم چەمپيوناتىنىڭ 2-ىرىكتەۋ ساتىسىندا ءتورتىنشى ويىنىن سلوۆەنياعا قارسى وتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

قۇرامالار ەۋروپا قۇرلىعى بويىنشا 5-توپتا سىنعا ءتۇستى. العاشقى ءۇش تۋردان كەيىن قازاقستاندىق فۋتزالشىلار توعىز ۇپاي جيناسا، سلوۆەنيالىقتار ەنشىسىندە التى ۇپاي بولدى. بۇگىنگى كەزدەسۋدە قازاقستاندىقتار كەم دەگەندە تەڭ تۇسكەن جاعدايدا جارىستىڭ ەليتالىق ساتىسىنا جولداما الاتىن ەدى.

ەكى قۇراما اراسىنداعى العاشقى ويىندا قازاقستاندىق فۋتزالشىلار 2:0 ەسەبىمەن جەڭىسكە جەتتى.

سونداي-اق ەل قۇراماسى چەرنوگوريانى چەرنوگوريانى 7:0، 5:1 ەسەبىمەن تىزە بۇكتىرگەن ەدى.

كەزدەسۋ بارىسىندا قۇرامالار ءبىر-بىرىنىڭ قاقپاسى ماڭىندا ءجيى بوي كورسەتتى. ويىننىڭ 4-مينۋتىندا قازاقستاندىق التەرت اقبالىقوۆ ەسەپ اشتى. ول ۇلتتىق قۇراما ساپىندا 50 ويىن وتكىزىپ، ءوزىنىڭ 16 گولىن سوقتى.

ال 8-مينۋتتا سلوۆەنيالىق جيگا چەح تارازى باسىن تەڭەستىردى. ودان كەيىن 14-مينۋتتا داۋرەن تۇرساعۇلوۆ قازاقستان قۇراماسىن قايتادان العا شىعارسا، تاينان 19-مينۋتتا ەسەپتى ۇلعايتا ءتۇستى.

ەكىنشى كەزەڭدە سلوۆەنيالىق يگور ومرەدكار 23، تەو تۋرك 25 -مينۋتتا مەرگەندىك تانىتتى.

كەزدەسۋ 3:3 ەسەبىمەن تەڭ اياقتالدى. قازاقستان قۇراماسى جارىستىڭ ەليتالىق ساتىسىنا جولداما الدى.

ايتا كەتسەك، ەل قۇراماسى الەم چەمپيوناتىنىڭ فينالدىق ساتىسىندا 2000، 2016، 2021 جىلداردا سىنعا ءتۇستى. ولار 2021 جىلى 4-ورىنعا تابان تىرەدى.

2024 جىلعى الەم چەمپيوناتى وتەتىن ەل ازىرگە انىقتالعان جوق. دوپ دوداسى سول جىلدىڭ قىركۇيەك-قازان ارالىعىندا وتكىزىلەدى دەپ جوسپارلانىپ وتىر.