كەزدەسۋدىڭ ءبىرىنشى كەزەڭىندە قوس قۇرامانىڭ ويىن دەڭگەيى قاتارلاس بولدى
فۋتبولدان UEFA ۇلتتار ليگاسى التىنشى تۋرىندا قازاقستان قۇراماسى ازەربايجان قۇراماسىمەن سىنعا ءتۇستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتسەك، س ليگاسى ءۇشىنشى توبىندا سىنعا تۇسكەن قازاقستاندىق فۋتبولشىلار ءبىر تۋر بۇرىن ۆ ديۆيزيونىنا جولداماعا قول جەتكىزدى. وعان قوسا 2024 جىلعى ەۋروپا چەمپيوناتى فينالدىق ساتىسىنا بەرىلەتىن جولدامانى ساراپقا سالۋعا مۇمكىندىك الدى.
سوعان قاراماستان ۇلتتىق قۇراما باپكەرى ماگومەد ادييەۆ ويىنعا نەگىزىنەن تاجىريەلى فۋتبولشىلاردى قوستى. ولاردىڭ قاتارىنا بۇدان بۇرىنعى كەزدەسۋلەرگە قاتىسپاعان ويىنشىلار قوسىلدى.
كەزدەسۋدىڭ ءبىرىنشى كەزەڭىندە قوس قۇرامانىڭ ويىن دەڭگەيى قاتارلاس بولدى. ويىننىڭ 35-مينۋتىندا قازاقستاندىق ءنۇرالي ءالىپ دورەكى قيمىلى ءۇشىن قىزىل قاعاز الىپ، الاڭنان قۋىلدى. دەگەنمەن ودان كەيىن دە الاڭ يەلەرى ءبىزدىڭ قاقپادان ساڭىلاۋ تابا العان جوق.
ەكىنشى كەزەڭنىڭ 66-مينۋتىندا الەكساندر ماروچكين ءوز قاقپاسىنا گول سوعىپ الدى. ال 74-مينۋتتا ازەربايجاندىق فيليپ وزوبيچ ەسەپتى ۇستەمەلەسە، اناتوليي نۋرييەۆ 90-مينۋتتا قورىتىندى ەسەپتى بەلگىلەدى.
وسىلايشا قازاقستان قۇراماسى ازەربايجانعا 0:3 ەسەبىمەن جول بەردى.
ايتا كەتسەك، ەكى قۇراما بۇعان دەيىن 7 مارتە شەبەرلىك بايقاستى. ونىڭ تورتەۋىندە قازاقستاندىق فۋتبولشىلار جەڭىسكە جەتسە، ەكەۋىندە كەزدەسۋ تەڭ اياقتالىپ، بىرەۋىندە ازەربايجاندىق قۇراما باسىم ءتۇستى.
سونداي -اق، اتالعان توپتا بۇگىن سلوۆاكيا مەن بەلارۋس قۇرامالارى 1:1 ەسەبىنە قاناعات ءبىلدىردى.
ەسكە سالساق، بۇدان بۇرىن قازاقستان ءوز الاڭىندا بەلارۋستى جەڭىپ كەتتى.