قۇقىقبۇزۋشىلىق تالعار اۋدانىنىڭ پوليسيا باسقارماسىندا تىركەلدى
تالعار اۋدانى ەركىن اۋىلىندا كاماز جۇرگىزۋشىسى ءيتتى جۇك كولىگىنە بايلاپ، كوشە ورتاسىندا سۇيرەدى. پوليسيا كاماز جۇرگىزۋشىسىنىڭ جەكە باسىن انىقتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كاماز ارتىندا جىپكە بايلانىپ، سۇيرەتىلىپ بارا جاتقان ءيتتىڭ ۆيدەوسى جەلىگە شىقتى.
الماتى وبلىسىنىڭ پوليسيا دەپارتامەنتى باستىعىنىڭ ورىنباسارى رۋستام ابدراحمانوۆ قۇقىقبۇزۋشىلىق تالعار اۋدانىنىڭ پوليسيا باسقارماسىندا تىركەلگەنىن مالىمدەدى.
«تەكسەرۋ جۇمىستارى اتالعان بولىمشەنىڭ قىزمەتكەرلەرىنە تاپسىرىلدى. قۇقىق بۇزۋشىنى مىندەتتى تۇردە انىقتاپ، شارا قولدانامىز»، - دەدى رۋستام ءابدىراحمانوۆ.
كەيىنىرەك ول كولىك جۇرگىزۋشىنىڭ كىم ەكەنى انىقتالعانىن ءمالىم ەتتى. ول 42 جاستاعى س. ەسىمدى ازامات بولىپ شىقتى. الداعى ۋاقىتتا تەكسەرۋ جۇمىستارىنىڭ ناتيجەسى تۋرالى قوسىمشا حابارلانادى.