قازاقستان فۋتبول فەدەراسياسى مەن ۋەفا قۇراما كوماندالار ءۇشىن جاڭا فۋتبول ەكيپيروۆكاسىن دايىنداۋ جونىندە كەلىسىمگە قول قويدى. بۇل تۋرالى Almaty.akshamy.kz Inform.kz-كە سىلتەمە جاساپ حابارلايدى.
كەلىسىم بويىنشا كيىم ۇلگىلەرى ۇلتتىق ورنەگى بار جەكە ديزايندا جاسالماق.
سونىمەن قاتار كەلىسىمنىڭ باستى ارتىقشىلىعى جانكۇيەرلەرگە ارنالعان ەكيپيروۆكالاردىڭ قول جەتىمدى بولۋى. ءار جانكۇيەر فان-شوپتاردان ۇلتتىق قۇرامانىڭ ەكسكليۋزيۆتى كيىم ۇلگىلەرىن، سونداي-اق ەرەكشە ديزايندا دايىندالعان تاۋارلاردى ساتىپ الۋ مۇمكىندىگىنە يە بولادى.
ۇلتتىق قۇراماعا ارنالعان جاڭا فۋتبول جەيدەلەرى يتاليالىق «Errea Sport» كومپانياسىمەن بىرگە ازىرلەنەدى. بارلىق ەكيپيروۆكا «100 OEKO-TEX» ستاندارتى بويىنشا سەرتيفيكاسيادان وتەدى. بۇل ستاندارت دەنساۋلىققا زيان زاتتارعا قاتاڭ شەكتەۋ قويادى.
ويىن فورماسى ءۇش جيىنتىقتان تۇرادى: ءۇي فورماسى، قوناق فورماسى جانە رەزەرۆ.
ەكيپيروۆكانىڭ ديزاين جۇمىستارىنا قازاقستاندىق ديزاينەرلەر جانە Errea ماماندارى قاتىسادى.
كەلىسىمگە قول قويۋ ءۇشىن ۋەفا پرەزيدەنتىنىڭ ۇلتتىق قاۋىمداستىقتار بويىنشا كەڭەسشىسى يوزەف كليمەنت قازاقستان استاناسىنا ارنايى كەلدى. ول فيفا-نىڭ ەۋروپالىق قاۋىمداستىقتار بويىنشا ديرەكتورى ەلحان مامادوۆپەن بىرگە 19 قىركۇيەك كۇنى وتەتىن قازاقستان فۋتبول فەدەراسياسىنىڭ كونفەرەنسياسىنىڭ مارتەبەلى قوناعى بولماق.
«قازاقستان فۋتبول فەدەراسياسىنا ۋەفا جانە ونىڭ سەرىكتەستىكتەرىنە ىنتىماقتاستىقتى قولداپ، Kit Assiatance Scheme باعدارلاماسىنا قوسىلعانى ءۇشىن العىسىمىزدى ايتامىز. بۇل شەشىم قازاقستاندىق فۋتبولدىڭ ءيميدجىن ارتتىرا تۇسەدى دەپ سەنەمىن. قازاق حالقىنىڭ ەرەكشەلەگىن بىلدىرەتىن جەكە ديزاين دايىنداۋعا جانە جەكە فان-شوپ ىسكە قوسۋعا مۇمكىندىك بار. ۋەفا بۇل شەشىمدى جان-جاقتى قولداۋعا دايىن»، - دەپ اتاپ ءوتتى ۋەفا پرەزيدەنتىنىڭ ۇلتتىق قاۋىمداستىقتار بويىنشا كەڭەسشىسى يوزەف كليمەنت.
«كونفەرەنسيا قارساڭىندا فيفا جانە ۋەفا-دان كەلگەن ارىپتەستەرىمىزبەن ءبىرقاتار كەزدەسۋلەر ۇيىمداستىرىلدى. بۇگىن ءبىز ۋەفا-نىڭ كەزەكتى باعدارلاماسىنىڭ قاتىسۋشىسى بولدىق. باعدارلاما قازاقستان قۇراماسىنىڭ ءيميدجىن ارتتىرادى دەپ سەنەمىن. قولداۋ كورسەتكەن ارىپتەستەرىمىزگە العىس ايتامىن»، - دەپ اتاپ ءوتتى قازاقستان فۋتبول فەدەراسياسىنىڭ باس حاتشىسى ولجاس ابرايەۆ.
ايتا كەتەيىك، ۇلتتىق قۇرامالار 2023 جىلعى ماۋسىمنان باستاپ جاڭا فورمامەن ويناي باستايدى.