فۋتبولدان قازاقستان ۇلتتىق قۇراماسىنىڭ باس باپكەرى مىندەتىن ۋاقىتشا اتقارۋشى بولىپ تالعات بايسۋفينوۆ تاعايىندالدى، - دەپ حابارلايدى Aqshamnews.kz.
بۇل تۋرالى قازاقستان فۋتبول فەدەراسياسى (قفف) رەسمي مالىمدەدى.
وتاندىق تاجىريبەلى مامان 2026 جىلعى الەم چەمپيوناتىنىڭ ىرىكتەۋ كەزەڭى اياسىندا وتەتىن الداعى ەكى ويىنعا قۇرامانى دايىندايدى. اتاپ ايتقاندا، قازاقستان 10 قازاندا ليحتەنشتەينمەن، ال 13 قازاندا سولتۇستىك ماكەدونيامەن كەزدەسەدى.
تالعات مارۋا ۇلى بۇعان دەيىن دە ۇلتتىق قۇرامانى ەكى كەزەڭدە — 2016–2017 جانە 2020–2022 جىلدارى باسقارعان. قازىرگى ۋاقىتتا ول جاستار قۇراماسى (U21) باپكەرلەرىنىڭ مەنتورى رەتىندە جۇمىس ىستەپ كەلەدى.
قازاقستان فۋتبول فەدەراسياسى ءبايسۋفينوۆتىڭ مول تاجىريبەسىنە سەنىم ارتىپ، الداعى ويىنداردا ساتتىلىك تىلەدى. سونىمەن قاتار، قفف ۇلتتىق قۇرامانىڭ تۇراقتى باس باپكەرى قىزمەتىنە ۇمىتكەرلەرمەن كەلىسسوزدەر جۇرگىزىپ جاتقانىن مالىمدەدى. تىزىمدە ءۇش شەتەلدىك مامان بار.
ەسكە سالا كەتەيىك، بۇعان دەيىن فۋتبولدان قازاقستان قۇراماسىنىڭ باس باپكەرى ءالي الييەۆ قىزمەتىنەن بوساتىلعانىن حابارلاعان ەدىك.