17-19 ناۋرىز كۇندەرى موگۋل جانە شاڭعى اكروباتيكاسى بويىنشا الەم كۋبوگىنىڭ فينالدىق كەزەڭى «شىمبۇلاق» تاۋ-شاڭعى كۋرورتىندا وتەدى.
الماتىداعى الەم كۋبوگى كەزەڭىنە دايىندىق جۇمىستارىنىڭ قالاي ءوتىپ جاتقانىن «شىمبۇلاق» تاۋ شاڭعىسى كۋرورتىنىڭ كوممەرسيالىق ديرەكتورى ۆلاديسلاۆ سەمەنوۆ ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«فينال الماتىدا وتەدى. مىقتىلاردىڭ ءبارى وسىندا باس قوسادى. مەدالدار ويناتىلىپ، التىن گلوبۋس تابىستالادى. ءبىزدىڭ كوماندانىڭ فريستايلدان وتە مىقتى ەكەنىن بىلەسىزدەر، سپورتشىلارىمىز جۇلدەلى ورىندارعا يە بولادى دەپ ۇمىتتەنەمىز»،- دەيدى ول.
«شىمبۇلاق» تاۋ شاڭعىسى كۋرورتىنىڭ ديرەكتورى رينات ءابدىراحمانوۆتىڭ سوزىنشە، موگۋل جارىسى جاڭا تراسسادا وتەدى.
«وسى جازدا ءبىز كوپ جۇمىس اتقاردىق. ءۇش شاقىرىمنان استام جولعا جاساندى قار جۇيەسىن قوسىپ، جولدى ۇزارتتىق. جەلتوقسان ايىندا ءبىز «سۋحوي لوگ» تراسساسىن ىسكە قوسۋدى جوسپارلاپ وتىرمىز، وندا وسى ماۋسىمدا پاراللەلدى جانە جەكە موگۋل بويىنشا الەم كۋبوگىنىڭ فينالدىق كەزەڭى وتەدى، بۇل بىزگە ۇلتتىق قۇراما ءۇشىن ارتەمەنكو تراسساسىن اشۋعا مۇمكىندىك بەرەدى. ءقازىر ءبىز ءارتۇرلى ەلدەردىڭ قۇرامالارىمەن التىدان استام كەزدەسۋ وتكىزدىك، ولار 11 جەلتوقساننان باستاپ بىزدە، وقۋ-جاتتىعۋ جيىندارىن وتكىزە باستايدى»، - دەدى ول.
ايتۋىنشا، تراسسانى جارىسقا دايىنداۋ قاڭتار ايىندا باستالادى.
«قازىرگى ۋاقىتتا 2023 جىلدىڭ جەلتوقسانىندا شاڭعى اكروباتيكاسىنان الەم كۋبوگىنىڭ ءبىرىنشى كەزەڭىن وتكىزۋگە قاتىستى FIS-پەن كەلىسسوزدەر جۇرگىزىلىپ جاتىر»،- دەدى رينات ءابدىراحمانوۆ.
ەسكە سالايىق، بىلتىر قازاقستاندا تۇڭعىش رەت فريستايلدان الەم چەمپيوناتى ءوتتى، ونىڭ قورىتىندىسى بويىنشا ءبىزدىڭ سپورتشىلار ءۇش مەدال جەڭىپ الدى.