مەگاپوليستىڭ ءار اۋدانىندا جاستارعا ارنالعان كوميۋنيتي ورتالىقتار اشىلدى، وندا ولار ءتۇرلى كۋرسقا تەگىن قاتىسىپ، شىعارماشىلىق يدەيالارمەن الماسادى، ءبىلىم الىپ، جۇمىس تا تابا الادى.
كوميۋنيتي ورتالىقتى دامىتۋ جونىندەگى جوبا قازاقستانداعى العاشقى ءارى ازىرگە جالعىز جوبا. بۇل ءۇشىن الماتى اكىمدىگى 2023 جىلى عيماراتتار ساتىپ الىپ، جوندەگەن. وسىلايشا، قالادا NEET دەلىنەتىن جاستاردىڭ پايىزىن قىسقارتۋ جانە جاس تالانتتاردىڭ دامۋىنا جاعداي جاساۋ جوسپارلانعان.
300 شارشى مەتردەن باستالاتىن قوعامدىق كەڭىستىكتى 8 كوميۋنيتي ورتالىق كوپ اۋديتوريادان تۇرادى، ىڭعايلى كوۆوركينگ ايماقتارىمەن جانە ىڭعايلى ءارى ۋاقىتتى ءتيىمدى وتكىزۋ ءۇشىن قاجەتتى جابدىقتارمەن جابدىقتالعان. كوميۋنيتي ورتالىقتار جىلىنا 800 مىڭنان استام جاسقا قىزمەت كورسەتەدى.
ءار ورتالىقتا رەزيدەنتتەرگە كۋرس تاڭداۋعا نەمەسە ماماندىق تۋرالى شەشىم قابىلداۋعا كومەكتەسەتىن ستەيكحولدەر بار. مىسالى، موبيلوگرافيا، تارگەتينگ نەمەسە SMM كۋرستارىن وقۋ، سونىمەن قاتار، كاسىپ اشقىسى كەلەتىندەر زاڭگەرلىك كەڭەس پەن كاسىپكەرلەردەن كەڭەس الا الادى.
جاستاردى كوپتەپ تارتۋ ءۇشىن ءتۇرلى ءتاسىل – اقپاراتتىق كىتاپشالار تاراتۋعا دەيىن قولدانىلادى. الايدا نەگىزىنەن الەۋمەتتىك جەلىلەرگە باسىمدىق بەرىلەدى.
مەدەۋ اۋدانىنداعى كوميۋنيتي ورتالىقتىڭ ستەيحولدەرى رۋستام قايرىيەۆتىڭ ايتۋىنشا، ورتالىقتاردا جۇمىسسىز جاستار بەلگىلى ءبىر جەتىستىككە جەتكەن زامانداستارىمەن تىعىز ارالاسىپ، قاي باعىتتا قيمىلداۋ كەرەكتىگى جايلى جاڭا باعدار الا الادى.
«مەدياساۋاتتىلىق كۋرسىن وتكىزەمىز، قازاق ءتىلىن دامىتامىز. بىزدە ۇيدەن شىقپاي-اق قازاق ءتىلىن تەگىن ۇيرەنۋگە مۇمكىندىك بەرەتىن قىزىقتى «ۇيدە سويلە» جوباسى بار: بۇعان قازاق ءتىلىن بىلەتىن كورشىلەر كومەكتەسەدى، ال كوميۋنيتي ورتالىقتا ايىنا ءبىر رەت قازاق ءتىلىن زاماناۋي ادىستەرمەن وقىتاتىن امباسسادورلارمەن كەزدەسۋلەر وتكىزىلەدى»، - دەيدى رۋستام قايرىيەۆ.
كوميۋنيتي ورتالىقتاردىڭ زاماناۋي ستيلدە جاسالعانىن، ال ديزايندا ەتنيكالىق ەلەمەنت بار ەكەنىن اتاپ وتكەن ءجون.
جەتىسۋ اۋدانىنىڭ اكىمى گۇلنار كوكەبايەۆانىڭ پىكىرىنشە، كوميۋنيتي ورتالىقتار جاستار باس قوساتىن ورىن عانا ەمەس، بۇل مەملەكەت باسشىسى ايتقانداي ولاردىڭ جان-جاقتى دامۋى ءۇشىن ارنايى كەڭىستىك بولادى.
«قالادا 14 جاستان 35 جاسقا دەيىنگى 689 مىڭعا جۋىق جاس بار. ونىڭ 58 مىڭى جەتىسۋ اۋدانىندا. 14 جاستان باستاپ كوپتەگەن وقۋشى بولاشاقتا قايدا وقۋ كەرەكتىگىن، قاي باعىتقا باسىمدىق بەرۋ كەرەكتىگىن سۇرايدى. سوندىقتان الماتىدا اشىلىپ جاتقان جاستارعا ارنالعان ورتالىقتار جاستارعا شىنىمەن كومەكتەسەتىنىنە سەنىمدىمىن»، - دەيدى گۇلنار كوكەبايەۆا.
كوميۋنيتي ورتالىقتارىندا مۋزىكانت مۇعالىمدەر دومبىرا ۇيرەنۋ ساباعىن وتكىزەدى. جاستارعا دىبىس جازۋ ستۋدياسى، پسيحولوگتىڭ كەڭەسى، ءوزىن-وزى دامىتۋ بويىنشا شەبەرلىك دارىستەرى جانە ت.ب. قولجەتىمدى. بۇعان قوسا، كوميۋنيتي ورتالىقتاردا جاستاردىڭ ءارتۇرلى ءبىلىم بەرۋ باعدارلامالارىن، وقۋ ورىندارىنداعى گرانتتار، سونىڭ ىشىندە اكىمنىڭ گرانتى تۋرالى بىلۋگە مۇمكىندىگى بار.
«قالادا جاستاردىڭ باس قوسىپ، جان-جاقتى دامىپ، ءبىلىم الۋىنا ارنالعان ورىندار جەتىسپەدى. بۇل جاستاردىڭ ارى-بەرى سابىلىپ جۇرمەۋىنە ىقپال ەتىپ، ءار اۋدان جاستارى ءۇشىن ەرەكشە ماڭىزدى ورىن بولادى»، - دەدى جاستاردى، مادەنيەت پەن سپورتتى دامىتۋ جونىندەگى جوبالىق كەڭسەنىڭ باسشىسى كريستينا بەكمۋرزايەۆا.
بارلىق ورتالىقتا كولىككە، قوعامدىق تاماقتانۋعا، سپورت جانە مادەني ينفراقۇرىلىمدى پايدالانۋعا، وقىتۋ مەن شەبەرلىك دارىستەرىنە جەڭىلدىكتەر بەرەتىن كەشەندى ديسكونتتىق كارتالار جۇمىس ىستەيدى. ورتالىقتىڭ ءاربىر رەزيدەنتى وسى ارتىقشىلىقتاردى پايدالانا الادى. وسىلايشا، مەگاپوليستە ءتيىمدى جاستار ساياساتى ءۇشىن كەشەندى ينفراقۇرىلىم قۇرۋ ماسەلەسى شەشىلىپ كەلەدى.
