«التىن وردا» بازارى سيفرلاندىرىلدى، دەپ حابارلادى ساۋدا جانە ينتەگراسيا مينيسترلىگى.
ساۋدا كوميتەتى «التىن وردا» بازارىنىڭ اكىمشىلىگىمەن بىرلەسىپ، بازار جۇمىسىنىڭ اشىقتىعىن قامتاماسىز ەتۋ ءۇشىن بىرلەسكەن ءىس-شارالار جوسپارىن بەكىتتى. ونىڭ شەڭبەرىندە 2023 جىلعى جەلتوقساننان باستاپ، بازاردىڭ كىرەبەرىسىنە 6 QR-كودى بار اۆتوماتتى شلاگباۋم مەن كىرۋ اقىسىن تولەۋ ءۇشىن پاۆيلونداردا 6 POS-تەرمينال ورناتىلدى.
سونداي-اق «التىن وردا» بازارىن سيفرلاندىرۋ بويىنشا altynordaresmi.kz سايتى ىسكە قوسىلدى.
وندا ازاماتتارعا قولجەتىمدى ساۋدا ورىندارىنىڭ سانى، ولاردىڭ الاڭى، جالداۋ قۇنى تۋرالى اقپارات، جالداۋ (پايدالانۋ) شارتىنىڭ تالابى، ونى بۇزۋ ءتارتىبى مەن نەگىزى تۋرالى مالىمەت كورسەتىلگەن. بازار باسشىلىعى تاراپىنان كەرى بايلانىس بولۋ ءۇشىن ونلاين-شاعىم بەرۋ جانە ۇسىنىس ەنگىزۋ مۇمكىندىگى ەنگىزىلدى.
جوعارىدا اتالعان ءىس-شارالار بازار قىزمەتىنىڭ اشىقتىعىن قامتاماسىز ەتۋگە، بيۋدجەتكە سالىق تولەمدەرىنىڭ تۇسىمدەرىن ۇلعايتۋعا مۇمكىندىك بەرەدى، - دەپ جازىلعان حابارلامادا.
ەستەرىڭىزگە سالا كەتەيىك، 2023 جىلدىڭ تامىزىندا ساۋدا جانە ينتەگراسيا ءمينيسترى ارمان شاققالييەۆ انىقتالعان بۇزۋشىلىقتاردى جويۋ، نارىقتى جاڭعىرتۋ جانە فەرمەرلەر ءۇشىن تەگىن ساۋدا ورىندارىن ۇسىنۋ جونىندەگى جۇمىستى ۇيلەستىرۋ ءۇشىن بازار اۋماعىندا ءموبيلدى توپتىڭ قاتىسۋىمەن كەڭەيتىلگەن كەڭەس وتكىزدى.
2023 جىلعى جەلتوقساندا ساۋدا كوميتەتىنىڭ ءتوراعاسى ايدار ابىلدابەكوۆ «التىن وردا» بازارىنا بارىپ، بازار اكىمشىلىگىمەن ساۋدا الاڭدارىن جاڭعىرتۋ ماسەلەلەرىن تالقىلادى. كەڭەس قورىتىندىسى بويىنشا ايدار ابىلدابەكوۆ قىسقا مەرزىمدە بيزنەس-پروسەستەردى سيفرلاندىرۋعا كوشۋدى جەدەلدەتۋدى تاپسىردى.