«FlyArystan» بيىل «Air Astana» كومپانياسىنان ءبولىنىپ شىعادى. بۇل جايىندا پرەمەر-مينيستر ءاليحان سمايىلوۆتىڭ ءماجىلىس دەپۋتاتتارىنىڭ ساۋالىنا جاۋابىندا ايتىلعان، دەپ حابارلايدى اlmaty-akshamy.kz.
«بۇگىنگى تاڭدا «FlyArystan» قۇرىلىمدىق بولىمشەسىن جەكە زاڭدى تۇلعاعا ءبولۋدىڭ كەزەڭدىك جوسپارى ازىرلەندى. «FlyArystan» اق جارعىسى بەكىتىلدى. سونداي-اق قايتا تىركەۋ راسىمدەرى جۇزەگە اسىرىلادى. كومپانيانىڭ ۇيىمدىق قۇرىلىمىن قالىپتاستىرۋ، اۋە كەمەلەرىن بەرۋ جانە «FlyArystan» اق قىزمەتىنىڭ باسقا دا باعىتتارى بويىنشا جۇمىستار جۇرگىزىلىپ جاتىر. ونىڭ ىشىندە كىرىستەر مەن شىعىستاردى بولەك ەسەپكە الۋدى ەنگىزۋ كوزدەلگەن»، - دەدى ۇكىمەت باسشىسى.
ونىڭ اتاپ وتۋىنشە، «FlyArystan» اق پايدالانۋشىنىڭ جەكە سەرتيفيكاتىن الۋعا قۇجاتتاردى بەرۋدى وسى جىلدىڭ 4 توقسانىنا جوسپارلاپ وتىر.
«بۇل ءىس-شارالار باسەكەلەستىك ورتانىڭ دامۋىنا، نارىق سۋبەكتىلەرى اراسىنداعى باسەكەلەستىك جولىمەن اۆيابيلەتتەر قۇنىنىڭ تومەندەۋىنە وڭ اسەر ەتەدى. جالپى، اۆياتاسىمالداۋ ماسەلەلەرى تۇراقتى باقىلاۋدا»، - دەدى پرەمەر-مينيستر.