الماتىعا كۇن سايىن بۇكىل لاتۆيا، استانانىڭ 2 نەمەسە باتىس قازاقستان وبلىسىنىڭ 5 اۆتوپاركى كىرەدى، دەپ حابارلايدى almaty-akshamy.kz t.me/almaty_akimat ارناسىنا سىلتەمە جاساپ.
پوليسيا دەپارتامەنتىنىڭ مالىمەتىنشە، 10 نەگىزگى ماگيسترال بويىنشا الماتى اۋماعىنا جۇمىس كۇندەرى ورتا ەسەپپەن 400 مىڭنان استام اۆتوموبيل كىرەدى. وبلىستان قالاعا كىرەتىن قوسىمشا 17 جولمەن 300 مىڭنان استام كولىك كەلەدى. وسىلايشا، الماتىعا 700 مىڭنان استام ماشينا كىرەدى، بۇل شامامەن قالا حالقىنىڭ ۇشتەن ءبىرى – 2،147 ملن ادام. بۇل 2023 جىلعى 6 قازاندا جۇما كۇنى «سەرگەك» اپپاراتتىق-باعدارلامالىق كەشەنى ارقىلى كوشەلەردى باقىلاۋ نەگىزىندە الىنعان دەرەكتەر.
الماتىعا جۇمىس كۇندەرى كەلەتىن جەكە كولىكتىڭ سانىن بۇكىل ەلدىڭ اۆتوپاركىمەن سالىستىرۋعا بولادى. لاتۆيادا حالىق سانى 1،891 ميلليون ادام. بۇل رەتتە، ەلدە 730 مىڭعا جۋىق اۆتوكولىك تىركەلگەن. بىلايشا ايتقاندا، وبلىستان الماتىعا ۇنەمى بۇكىل لاتۆيا «كىرەدى». جەرگىلىكتى دەڭگەيدە ەسەپتەسەك، بۇل باتىس قازاقستان وبلىسىنىڭ 5 (134 172 كولىك) نەمەسە استانانىڭ 2 اۆتوپاركى (326 مىڭنان استام كولىك تىركەلگەن) دەگەن ءسوز.
سىرتتان كىرەتىن كولىكتەرمەن قوسا، الماتىنىڭ وزىندە 617 مىڭعا جۋىق اۆتوموبيل تىركەلگەن. بۇعان وبلىستان كەلەتىن 400 مىڭنان استام كولىكتى قوسقاندا، مەگاپوليس كوشەلەرىندە 1 ملن 100 مىڭنان استام ماشينا جۇرەدى. باسقاشا ايتساق، بۇل قالامىزدىڭ ءاربىر ەكىنشى تۇرعىنى كولىك تىزگىندەگەندەي جاعداي، دەپ حابايلايدى الماتى اكىمدىگىنىڭ (https://t.me/almaty_akimat) تەلەگرام ارناسى.
انىقتاما: بۇل دەرەكتەر «سەرگەك» اپپاراتتىق-باعدارلامالىق كەشەنى ارقىلى الماتى قالاسىنىڭ اۋماعىندا جۇرەتىن اۆتوكولىكتى تالداۋ نەگىزىندە الىندى.
