سۇلتان ءشارىپ ۇلى ورازالين – جۋرناليست، جازۋشى، تەلەدراماتۋرگ، قوعام قايراتكەرى. قازاق تەليەۆيزياسىنىڭ قۇرمەتتى ارداگەرى. قازاقستاننىڭ ەڭبەك سىڭىرگەن قايراتكەرى. حالىقارالىق تەليەۆيزيا جانە راديو اكادەمياسىنىڭ اكادەميگى. قازاقستان جۋرناليستەر وداعى سىيلىعىنىڭ جانە قازاقستان پرەزيدەنتىنىڭ جۋرناليستيكا سالاسىنداعى سىيلىعىنىڭ يەگەرى.
بەلگىلى فيلولوگ-عالىم سۇلتان ورازالين دۇنيە سالدى، دەپ حابارلايدى Almaty-akshamy.kz
اقپارات جانە قوعامدىق دامۋ ءمينيسترى ايدا بالايەۆا سۇلتان ءورازاليننىڭ قايتىس بولۋىنا بايلانىستى مارقۇمنىڭ وتباسى، تۋعان-تۋىستارىنا كوڭىل ايتتى.
«ەل رۋحانياتى تاعى ءبىر تارلانىنان ايىرىلدى. الاشتىڭ ارداقتىسى، ءتىل جاناشىرى، بەلگىلى فيلولوگ-عالىم، قازاق راديوسى مەن تەليەۆيزياسىنا ەرەكشە ەڭبەگى سىڭگەن اسىل اعامىز سۇلتان ورازالين دۇنيە سالدى. سانالى عۇمىرىن قازاقتىڭ ادەبيەتى مەن مادەنيەتىن دارىپتەپ، تۋعان ءتىلىنىڭ تۇعىرىن، ۇلتىنىڭ ۇلىق مۇددەلەرىن تۋ ەتكەن ەسىل تۇلعا ارتىنا التى ۇرپاققا ازىق بولار شىعارماشىلىق ۇلەس پەن عىلىمي مۇرا قالدىرىپ كەتتى. تاۋەلسىزدىكتىڭ تاڭىندا ءتاي-تاي باسقان جاس مەملەكەتتىڭ يگىلىگىنە قىزمەتكە كەلىپ، ۇلتتىق ءورىسىن كەڭەيتۋگە بىلەك سىبانا كىرىسكەن سۇلتان اعامىز جىلدار وتە ۇكىمەت پەن پرەزيدەنت جانىنداعى ءتۇرلى القالاردىڭ اينىماس مۇشەسى، اقىلمان ابىزىنا اينالدى. وتاندىق ءتىل ساياساتى، ونەر مەن مادەنيەت ماسەلەلەرىنە قاتىستى قۇندى عىلىمي ىزدەن ىستەرى مەن كەسەك ويلى شىعارمالارى وسكەلەڭ ۇرپاقتىڭ ىلىم-بىلىمىنە قوسىلعان ۇلكەن ميراس ەدى. امال قانشا…اجالعا اراشا جوق. دەسە دە، ۇلى تۇلعانىڭ وسىناۋ ۇلىق جولى مەن ونەگەسى ونىڭ ءومىرىنىڭ رۋحاني جالعاسى بوپ ماڭگىلىككە ەل ەسىندە قالادى. جاتقان جەرىڭىز جارىق، يمانىڭىز بەرىك، توپىراعىڭىز تورقا بولسىن، اسىل اعا! وسىناۋ قايعىعا ورتاقتاسىپ، مارقۇمنىڭ وتباسى، تۋعان-تۋىستارىنا كوڭىل ايتامىن»، - دەپ جازدى ايدا بالايەۆا جەلىدەگى پاراقشاسىندا.