فەرمەرلەردىڭ سۋبسيديالاۋعا بەرگەن وتىنىمدەرىنىڭ ۇشتەن ءبىرى قابىلدانبادى

تىڭايتقىشتاردى ساتىپ الۋدى سۋبسيديالاۋ اياسىندا فەرمەرلەرگە 7،5 ملرد تەڭگە تولەندى.

قازاقستاندىق فەرمەرلەر بۇگىنگى كۇنگە دەيىن تىڭايتقىشتاردى سۋبسيديالاۋعا 13 251 ءوتىنىم بەردى، دەپ حابارلايدى اlmaty-akshamy.kz.

اشم باسپا ءسوز قىزمەتىنىڭ مالىمەتىنشە، وڭىرلەردىڭ اۋىل شارۋاشىلىعى باسقارمالارىندا 9027 ءوتىنىم بار، 2040 ءوتىنىش قابىلدانبادى، ال 7،5 ملرد تەڭگە سوماسىنا 2184 ءوتىنىم ماقۇلداندى جانە ءتيىستى سوما تولەندى.

ايتا كەتەيىك، بۇعان دەيىن gosagro.kz پورتالىندا وتىنىمدەردىڭ ۇشتەن ءبىرى قابىلدانبادى. مەملەكەتتىك قولداۋدان باس تارتۋدىڭ نەگىزگى سەبەبى بەكىتىلگەن سۋبسيديالاۋ قاعيدالارىنا سايكەس 2023 جىلعى 1 قاڭتاردا كۇشىنە ەنگەن اگروحيميالىق كارتوگراممالاردىڭ بولماۋى، سونداي-اق القاپتاردى سيفرلاندىرۋداعى قيىندىقتار بولدى. سولتۇستىك ايماقتارمەن سالىستىرعاندا، وڭتۇستىكتە شاعىن ەگىستىكتەرى بار فەرمەرلەر باسىم.

بۇل ماسەلەنى شەشۋ ءۇشىن اۋىل شارۋاشىلىعى مينيسترلىگى 2023 جىلعى 25 ساۋىردە جوعارىدا اتالعان قاعيدالارعا اگروحيميالىق كارتوگراممالاردى پايدالانۋ جونىندەگى تالاپتى الىپ تاستاۋ بويىنشا تۇزەتۋلەردى بەكىتتى، سونداي-اق 2023 جىلعى 31 جەلتوقسانعا دەيىن «قازاقستان عارىش ساپارى «ۇك» اق ارقىلى ەگىستىكتەردى سيفرلاندىرۋدى كەيىنگە قالدىرۋدى ەنگىزىلدى.

بەلگىلەنگەن مەرزىمگە دەيىن فەرمەرلەر وسى ەگىستىكتەردى قۇقىق بەلگىلەيتىن قۇجاتتارعا سايكەس مىندەتتى تۇردە تۇزەتۋى قاجەت ەكەنىن اتاپ وتكەن ءجون. ءتيىستى كەستەنى اشم «قازاقستان عارىش ساپارى «ۇك» اق-مەن بىرلەسىپ دايىنداپ جاتىر.

سونداي-اق، سۋبسيديالاردى الۋعا وبلىس اكىمدىكتەرىنىڭ تىڭايتقىشتاردى سۋبسيديالاۋ تىزبەلەرى مەن نورمالارى تۋرالى ءتيىستى قاۋلىلارىنىڭ بولماۋى كەدەرگى بولدى. جەرگىلىكتى اتقارۋشى ورگاندار نورماتيۆتەردى تەك ناۋرىز ايىنان باستاپ، مامىرعا دەيىن بەكىتە باستادى. اتاپ ايتقاندا، اتىراۋ وبلىسىندا قاۋلى وسى كۇنگە دەيىن قابىلدانعان جوق. وڭىرلىك اكىمدىكتىڭ اقپاراتى بويىنشا قۇجات جاقىن ارادا بەكىتىلەتىن بولادى.

جالپى، تىڭايتقىشتاردى سۋبسيديالاۋعا وتىنىمدەردى بەرۋ gosagro.kz پورتالى ارقىلى تولىق اۆتوماتتاندىرىلعان، دەرەكتەردى «قولمەن» ەنگىزۋگە جول بەرمەيدى. بۇل مەملەكەتتىك قولداۋ الۋ كەزىندە ادامي فاكتوردى بولدىرمايدى، ياعني بيۋدجەت قاراجاتىن ءتيىمدى جانە ۇتىمدى پايدالانۋعا مۇمكىندىك بەرەدى.