پاندەميا تۋرالى تاعى ءبىر جالعان اقپارات تارادى
قازاقستاندىقتار الەۋمەتتىك جەلىلەردە «پاندەميا تەك 2025 جىلى اياقتالادى» دەپ جازىلعان حالىقارالىق قايتا قۇرۋ جانە دامۋ بانكى مەن حالىقارالىق دامۋ قاۋىمداستىعى قۇجاتىنىڭ سكرينشوتىن تاراتىپ جاتىر، دەپ حابارلايدى Almaty-akshamy.kz
جەلى قولدانۋشىلارى ايتىپ وتىرعان قۇجات بار جانە بارشاعا قولجەتىمدى. وندا COVID-19 پاندەمياسىنىڭ قاشان اياقتالاتىنى تۋرالى بولجام جاسالماعان. ءىس جۇزىندە قۇجاتتا «وسى جاھاندىق پاندەميامەن جانە ونىڭ سالدارىمەن كۇرەستە حدق جانە حقدب باعدارلاماسىنا قاتىسۋعا قۇقىعى بار ەلدەرگە» كومەك پەن قولداۋ كورسەتۋ تەتىكتەرى سيپاتتالعان.
بۇل تىزىمگە اۋعانستان، ارگەنتينا، كابو-ۆەردە، كامبودجا، كونگو دەموكراتيالىق رەسپۋبليكاسى، دجيبۋتي، ەكۆادور، ەفيوپيا، گامبيا، گانا، گايتي، ءۇندىستان، كەنيا، قىرعىز رەسپۋبليكاسى، مالديۆ، ماۆريتانيا، موڭعوليا، پاكىستان، پاراگۆاي، سان-تومە جانە پرينسيپي، سەنەگال، سەررا-لەونە، شري-لانكا، تاجىكستان جانە يەمەن كىرگەن. ياعني، قۇجات پاندەميانى جوسپارلاۋعا ەمەس، مۇقتاج ەلدەرگە كومەك تاراتۋعا ارنالعان. بۇل باعدارلاما 2020 جىلدىڭ 2 ساۋىرىنەن 2025 جىلدىڭ 31 ناۋرىزىنا دەيىنگى كەزەڭگە ارنالعان.
ياعني، وسى كەزەڭدە بانك COVID-19 پاندەمياسى كەزىندە قولداۋدى قاجەت ەتەتىن ەلدەرگە بارىنشا كومەك كورسەتەدى. حالىقارالىق قايتا قۇرۋ جانە دامۋ بانكىنىڭ پاندەميا جاريالاۋعا نەمەسە ونى ۇزارتۋعا قۇقىعى جوق. سونىمەن قاتار، پاندەميانىڭ اياقتالۋى بەلگىلى ءبىر ورگانداردىڭ مالىمدەمەسىنە ەمەس، بۇكىل الەمدەگى COVID-19 اۋرۋشاڭدىق دەڭگەيىنە بايلانىستى. دەمەك، جەلىدە تابىلعان قۇجات حالىقارالىق قايتا قۇرۋ جانە دامۋ بانكىنىڭ قىزمەتكەرلەرى قانداي دا ءبىر قۇپيا اقپاراتتى بىلەتىنىن ەمەس، بانكتىڭ مۇقتاج ەلدەرگە كومەك كورسەتەتىنىن عانا دالەلدەيدى.