الماتى قالالىق كارديولوگيا ورتالىعىنىڭ كارديولوگى بوتاكوز اۋباكىروۆا قۇرامىندا ماي، تۇز بەن قانتتىڭ كوپتىگىمەن بەلگىلى فاستفۋدتىڭ — جۇرەك-قانتامىر اۋرۋلارىنىڭ باستى سەبەبىنىڭ ءبىرى ەكەنىن ايتتى، دەپ حابارلايدى Almaty-akshamy.kz.
دارىگەردىڭ ايتۋىنشا، بۇل تاعامدى ۇنەمى تۇتىنۋ حولەستەرين مەن قان قىسىمىنىڭ جوعارىلاۋىنا اكەلۋى مۇمكىن.
ال بۇل جۇرەك اۋرۋلارىنىڭ ءورشۋ ءقاۋپىن ارتتىرادى.
«فاستفۋدتاعى قانىققان ماي ارتەريادا حولەستەرين تۇيىندەرىنىڭ پايدا بولۋىنا اكەلۋى مۇمكىن. بۇل قالىپتى قان اعىمىنا كەدەرگى كەلتىرەدى جانە اتەروسكلەروزعا سەبەپ بولادى. وسى جاعداي ميوكارد ينفاركتىسى مەن ينسۋلت ءقاۋپىن ارتتىرادى. فاستفۋدتا تۇزدىڭ كوپ بولۋى قان قىسىمىنىڭ جوعارىلاۋى — گيپەرتونياعا اپارىپ سوعۋى ىقتيمال. بۇل — جۇرەك-قانتامىر اۋرۋلارىنىڭ نەگىزگى ءقاۋىپتى فاكتورلارىنىڭ ءبىرى»، — دەدى بوتاكوز اۋباكىروۆا.
فاستفۋد ادەتتە قانت پەن قاراپايىم كومىرسۋعا باي.
ال مۇنداي تاعامدى ۇنەمى تۇتىنۋ قانت ديابەتىنىڭ ورشىتەدى. جۇرەك پروبلەمالارىنىڭ تاعى ءبىر سەبەبى — وسى.
«دۇرىس تاماقتانۋ — جۇرەك دەنساۋلىعىنىڭ كەپىلى ەكەنىن ءتۇسىنۋ ماڭىزدى. فاستفۋدتىڭ ورنىنا جاڭا پىسكەن كوكونىس پەن جەمىستى، پايدالى مايلاردى، مىسالى، ءزايتۇن مايى، بالىق مايىن جانە اقۋىزدىڭ مايسىز كوزدەرىن، مىسالى، تاۋىقتىڭ ءتوس ەتى نەمەسە بالىق تۇتىنعان ءجون. سونداي-اق، ءوز سالماعىڭىزدى باقىلاپ، بەلسەندى ءومىر سالتىن ساقتاۋ دا ماڭىزدى. تۇراقتى فيزيكالىق بەلسەندىلىك جۇرەك پەن قان تامىرلارىن نىعايتۋعا، سونداي-اق دەنەنىڭ جالپى جاعدايىن جاقسارتۋعا كومەكتەسەدى»، — دەدى دارىگەر.
دارىگەر فاستفۋد قولجەتىمدى ءارى جىلدام دايىندالۋىنا بايلانىستى جاقسى تاعام بولۋى مۇمكىن، الايدا، دەنساۋلىعىمىز — ءبىزدىڭ باستى بايلىعىمىز ەكەنىن ۇمىتپاۋعا كەڭەس بەردى.