Facebook الەۋمەتتىك جەلىسىندە Meta نەگىزىن قالاۋشى مارك سۋكەربەرگتىڭ ۆيدەوسىمەن فەيك اقپارات تاراۋدا، دەپ حابارلايدى almaty-akshamy.kz stopfake.kz سىلتەمە جاساپ.
مارك سۋكەربەرگتىڭ ايتۋىنشا، كومپانيا ءاربىر قازاقستاندىققا ءپاسسيۆتى تابىس تابۋعا مۇمكىندىك بەرەتىن ارنايى Libra پلاتفورماسىن ىسكە قوستى. جاڭالىق «حابار 24» دەپ اتالاتىن اككاۋنتتا جاريالانعان. مۇنىڭ ءبارى الداۋ جانە الاياقتىق.
روليك شىققان Facebook پاراقشاسىنىڭ قازاقستاندىق «حابار 24» تەلەارناسىنا ەشقانداي قاتىسى جوق. بۇل 2023 جىلدىڭ 2 قازانىندا اشىلعان جانە ەشتەڭە جاريالاماعان فەيك اككاۋنت. سونىمەن قاتار پاراقشادا «حابار 24» تەلەارنا ەمەس، سپورتتىق كوماندا دەپ كورسەتىلگەن.
تەلەارنانىڭ Facebook-تەگى پاراقشاسى 24kz دەپ اتالادى جانە وندا قازاقستاندىقتارعا ارنالعان ءپاسسيۆتى تابىس تابۋعا بولاتىن Meta جوبالارى تۋرالى جازىلماعان.
سۋكەربەرگتىڭ تاراعان ۆيدەوسىنىڭ سكرينشوتىن تەكسەرگەندە ءۇزىندىنىڭ كاسىپكەردىڭ 2022 جىلعى 24 ناۋرىزداعى سۇحباتىنان الىنعانى انىقتالدى. اعىلشىن تىلىندەگى ءتۇپنۇسقا ۆيدەودا ول كومپانيانىڭ دامۋ جانە ءوسۋ ستراتەگياسى تۋرالى ايتادى، قازاقستان مەن Libra جوباسى تۋرالى ءسوز قوزعامايدى.
ايتا كەتەيىك، Meta-دا وسىلاي اتالاتىن جوبا بولعان. كەز كەلگەن ادامعا ءپاسسيۆتى تابىس تابۋعا مۇمكىندىك بەرەتىن پلاتفورما ەمەس، كومپانيا شىعاراتىن كريپتوۆاليۋتا وسىلاي اتالۋعا ءتيىس ەدى، ءبىراق. 2022 جىلدىڭ اقپانىندا Libra Meta كومپانياسىنا ايتارلىقتاي تابىس اكەلمەيتىنى بەلگىلى بولىپ، جوبا باسقاعا ساتىلدى.