شامامەن 1 مىڭ تۋريست ەۆەرەستىڭ شىعىس بەتكەيىندە قاتتى بوران سالدارىنان شاتىرلاردا پانالاۋعا ءماجبۇر بولدى، - دەپ حابارلايدى Aqshamnews.kz.
4 قازان كۇنى تاۋدىڭ شىعىس بەتكەيىندە سوڭعى جىلدارداعى ەڭ كۇشتى بوراننان كەيىن نەگىزگى مارشرۋتتار تولىقتاي جابىلىپ، كورىنۋ كۇرت 1 مەترگە دەيىن تومەندەگەن. جوعارىعا شىعاتىن تۋريستەر مۇزداق جولدارمەن ءارى قاراي جۇرە الماي، ءوز شاتىرلارىنا پانالاۋعا ءماجبۇر بولعان. كەيبىر تۋريستەر تومەن قاراي ءتۇسۋىن جالعاستىرسا دا، كوپشىلىگى قۇتقارۋشىلاردىڭ كومەگىنە مۇقتاج، دەپ جازادى باسىلىم.
«سزيمۋ سينۆەن» اقپاراتتىق پورتالىنىڭ مالىمەتى بويىنشا، تۋريستەر 4 900 مەتر بيىكتىكتەگى لاگەردە تۇرىپ قالدى.
قىتايدىڭ تيبەت اۆتونوميالىق اۋدانىنىڭ شيگادزە قالاسى بيلىگى قۇتقارۋشىلار توپتارىن تۋريستەرگە كومەك كورسەتۋ ءۇشىن جىبەرگەنىن حابارلادى.
ەۆەرەست (دجومولۋنگما) ماحالانگۋر-حيمال گيمالاي جوتاسىنا كىرەدى، تاۋ نەپال مەن قىتايدىڭ تيبەت اۆتونوميالىق ايماعىنىڭ شەكاراسىندا ورنالاسقان. 2020 جىلدىڭ جەلتوقسانىندا جۇڭگو مەن نەپال بىرلەسكەن ەكسپەديسيالاردان كەيىن ەۆەرەستىڭ جاڭا بيىكتىگىن جاريالادى: ول 8 848،86 مەتردى قۇرايدى، بۇل بۇرىنعىدان 86 سم جوعارى،- دەپ جازادى kaz.inform.kz.