دۇنيەجۇزىلىك دەنساۋلىق ساقتاۋ ۇيىمىنىڭ بولجامى بويىنشا قىستا ەۋروپادا كەمىندە 500 مىڭ ادام كوروناۆيرۋستان كوز جۇمۋى مۇمكىن دەپ حابارلايدى almaty-akshamy.kz قازاقپاراتقا سىلتەمە جاساپ.
«ەگەر ەو ەلدەرى پاندەمياعا بايلانىستى شەكتەۋلەردى كۇشەيتپەسە، بۇل بولجام جۇزەگە اسۋى مۇمكىن، - دەدى ددۇ ەۋروپالىق بيۋروسىنىڭ ديرەكتورى حانس كليۋگە.
«COVID-19 كەزەكتى رەت ءبىزدىڭ ايماقتا ءولىم-جىتىمنىڭ باستى سەبەبى بولىپ وتىر، جاڭا تولقىننىڭ تۋىنداۋى سۋىق اۋا رايىنىڭ جاقىنداۋىنا، ءبىرقاتار ەلدەردە ۆاكسيناسيانىڭ تومەن قارقىنىنا جانە SARS-CoV-2 جۇقپالى شتامدارىنىڭ پايدا بولۋىنا بايلانىستى».
وسىعان وراي اۆستريادا بۇگىننەن باستاپ جالپىۇلتتىق لوكداۋن ەنگىزىلەدى، دانيادا كينوتەاترلارعا، تۇنگى كلۋبتار مەن مەيرامحانالارعا بارۋ ءۇشىن كوۆيد-پاسپورتتار مىندەتتى بولىپ تابىلادى.
ال گەرمانيانىڭ فەدەرالدى ايماقتارىندا covid-19 ينفەكسياسىنىڭ تارالۋ قارقىنى باسەڭدەۋدە. روبەرت كوح ينستيتۋتىنىڭ مالىمەتى بويىنشا وتكەن تاۋلىكتە ەلدە 42 727 كوروناۆيرۋس ينفەكسياسىنا شالدىعۋ جاعدايلارى تىركەلگەن، ءبىر كۇن بۇرىن بۇل كورسەتكىش 63 مىڭنان استام دەرەكتى قۇرادى.
SARS-CoV-2 ينفەكسياسىنىڭ راستالعان جاعدايلارىنىڭ جالپى سانى 5،5 ملن-عا جۋىقتادى، ناقتىراق 5 354 942-گە جەتتى. سوڭعى 24 ساعات ىشىندە 75 ناۋقاس اۋرۋ سالدارىنان كوز جۇمدى، ال پاندەميا باستالعاننان بەرى گەرمانيادا 99 062 ادام COVID-19 اسقىنۋىنان كوز جۇمدى.