الدىڭعى رەكوردتان 10%-دان استام جوعارى
نيدەرلاندىداعى TTF ساۋدا الاڭىندا گاز باعاسى قايتا قىمباتتادى. سەيسەنبى كۇنى تاڭەرتەڭ ءبىر مەگاۆاتت-ساعات ەلەكتر ەنەرگياسىنىڭ قۇنى 291 ەۋروعا دەيىن كوتەرىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
دۇيسەنبى، 22 تامىز كۇنى TTF حابىنداعى ساۋدا 1 مۆت/ساع ءۇشىن 276 ەۋرومەن اياقتالعان. بۇل وتكەن جۇمادا ورناتىلعان ءبىر مۆت/ساع 244،55 ەۋرونى قۇراعان الدىڭعى رەكوردتان 10%-دان استام جوعارى.
بۇگىن تاڭەرتەڭ باعا 291 ەۋروعا دەيىن كوتەرىلگەن. ولاي بولعانىمەن، جەرگىلىكتى ۋاقىت بويىنشا 14:25-تە گاز باعاسى 271 ەۋروعا دەيىن تومەندەدى. دەگەنمەن، ماماندار گازدىڭ قازىرگى باعاسى جىلدىڭ وسى مەزگىلىندە ادەتتەگىدەن 15 ەسە جوعارى ەكەنىن اتاپ ءوتتى.
گاز باعاسى رەسەيلىك «گازپروم» كومپانياسىنىڭ 31 تامىزدان باستاپ «سيەۆەرنىي پوتوك» گاز قۇبىرىندا ءۇش كۇندىك جوندەۋ جۇمىستارىن جۇرگىزەتىندىگى تۋرالى مالىمدەمەسىمەن بايلانىستى كوتەرىلگەن.
دەمالىس كۇندەرى نەمىس ساياساتكەرلەرى گازبەن قامتاماسىز ەتۋ جاعىنان قيىندىقتار تۋىندايتىنىن ەسكەرتتى. بۇعان قاتىستى الاڭداۋشىلىعىن بەلگيانىڭ پرەمەر-مينيسترى الەكساندر دە كروو دا بىلدىرگەن. دۇيسەنبىدە سويلەگەن سوزىندە ا.كروو الداعى ايلار مەن قىستىڭ عانا ەمەس، «الداعى بەس-ون قىستىڭ دا قيىن بولاتىنىن» ايتتى.