بۇۇ-نىڭ 27ء-شى كليماتتىق كونفەرەنسياسى
ەۋروپالىق كوميسسيانىڭ ءتورايىمى ۋرسۋلا فون دەر ليايەن سولتۇستىك جارتى شار مەملەكەتتەرىن جاھاندىق وڭتۇستىككە قارجىلىق قولداۋدى جەدەلدەتۋگە شاقىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
Euronews اقپارات اگەنتتىگىندەگى مالىمەت بويىنشا، مىسىردا وتكەن بۇۇ-نىڭ 27ء-شى كليماتتىق كونفەرەنسياسىندا سويلەگەن سوزىندە ول دامىعان ەلدەر جاھاندىق جىلىنۋ اسەرىنەن ەڭ وسال ايماقتارعا كومەك كورسەتۋ ءۇشىن جىل سايىن 100 ملرد دوللار پاكەتىن ءبولۋدى ۋادە ەتكەنىن ەسكە سالدى.
13 جىل بۇرىن كوپەنگاگەندە 15ء-شى كونفەرەنسيا كەزىندە بەرىلگەن بۇل ۋادە ءالى ورىندالعان جوق.
ەكونوميكالىق ىنتىماقتاستىق جانە دامۋ ۇيىمى (ەىدۇ) 2020 جىلى باي ەلدەردىڭ مەملەكەتتىك جانە جەكە قور تۇرىندە جۇمىلدىرعان جالپى سوما 83 ملرد-تان ءسال عانا اسادى دەپ ەسەپتەيدى.
«وڭتۇستىك ەلدەر رەسۋرستارعا باي. كۇشىمىزدى بىرىكتىرەيىك. ەۋروپالىق وداق مىسىر، ناميبيا جانە قازاقستانمەن سۋتەگى سەرىكتەستىگى جونىندە كەلىستى. ءبىز ۆەتنام جانە وڭتۇستىك افريكا سياقتى سەرىكتەستەرگە ەكونوميكاسىن كومىرتەكسىزدەندىرۋدە قولداۋ كورسەتەمىز. وسىدان 7 جىل بۇرىن پاريج كونفەرەنسياسىندا قويىلعان ماقساتقا جەتۋىمىز كەرەك. ەۋروپا كوزدەگەن باعىتىنان تايمايدى. 2030 جىلعا قاراي پارنيك گاز شىعارىندىلارىن كەم دەگەندە 55%-عا ازايتامىز»، - دەدى ەۋروكوميسسيا ءتورايىمى.
دەگەنمەن، كەيبىر مامانداردىڭ پىكىرىنشە، كونفەرەنسياعا قاتىسۋشىلاردىڭ ءبارى بىردەي زياندى شىعارىندىلار پاكىستانداعى اپاتتى سۋ تاسقىنى سياقتى ەكسترەمالدى اۋا رايى جاعدايىنا قالاي ۇشىراتاتىنىن تۇسىنبەيدى.
«Copernicus» باعدارلاماسى (كليمات مونيتورينگى قىزمەتى) ساراپشىلارىنىڭ حابارلاۋىنشا، رەكوردتى ىستىق جازدان كەيىن ەۋروپادا قازان ايىندا تەمپەراتۋرا ەڭ جىلى كورسەتكىشكە جەتتى.
1991-2020 جىلدار ارالىعىنداعى بازالىق كورسەتكىش سەلسيي بويىنشا 2 گرادۋسقا ارتتى.