رەسپۋبليكانىڭ اۆياسيالىق بيلىگى قابىلداپ جاتقان شارالاردى وڭ قابىلدادى.
ماماندار قازاقستاندا ىسكە اسىرىلىپ جاتقان ازاماتتىق اۆياسيانى رەتتەۋدىڭ ەۋروپالىق مودەلىن جوعارى باعالاپ، قولدادى. بۇل تۋرالى ازاماتتىق اۆياسيا كوميتەتى مالىمدەدى، دەپ حابارلايدى Almaty-akshamy.kz Baq.kz سىلتەمە جاساپ.
2022 جىلعى 20 قازاندا بريۋسسەل قالاسىندا (بەلگيا) ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياسيا كوميتەتىنىڭ ءتوراعاسى تالعات لاستايەۆ باستاعان قازاقستاندىق دەلەگاسيا «قازاقستاننىڭ اۆياسيالىق اكىمشىلىگى» اق باس ديرەكتورى كاتالين رادۋ مەن ءقاا وكىلدەرىنىڭ قاتىسۋىمەن ەۋروپالىق كوميسسيامەن، ۇشۋ قاۋىپسىزدىگى جونىندەگى ەۋروپالىق اگەنتتىكپەن (EASA) جانە ەۋروپالىق وداق مۇشەلەرى مەملەكەتتەر وكىلدەرىمەن تەحنيكالىق كەزدەسۋ وتكىزدى.
ەۋروپالىق دەلەگاسيانى ەۋروپالىق كوميسسيانىڭ ۇشۋ قاۋىپسىزدىگى ءبولىمى باسشىسىنىڭ ورىنباسارى پيتەر سورەنسەن باسقاردى.
«كەزدەسۋ بارىسىندا قازاقستاندىق تاراپ ۇشۋدى پايدالانۋ، ۇشۋعا جارامدىلىق، اۆياپەرسونالدى ليسەنزيالاۋ جانە قازاقستانداعى ۇشۋ قاۋىپسىزدىگىنىڭ دەڭگەيىن جاقسارتۋ بويىنشا ءقاا پروسەستەرىن ستاندارتتاۋ بولىگىندە قابىلدانعان شارالار مەن ىسكە اسىرىلىپ جاتقان تۇزەتۋ ءىس-قيمىلدارىنىڭ جوسپارلارى تۋرالى حاباردار ەتتى. ونىڭ ىشىندە ءقاا قارجىلاندىرۋدىڭ جاڭا ءتاسىلىن ەنگىزۋ جانە قازاقستانداعى ازاماتتىق اۆياسيا سالاسىن رەتتەۋدىڭ ەۋروپالىق مودەلىنە ودان ءارى جوسپارلى كوشۋ بولىگىندە قازاقستان رەسپۋبليكاسىنىڭ قولدانىستاعى زاڭناماسىنا كۇتىلەتىن وزگەرىستەر تانىستىرىلدى. ەۋروپالىق تاراپ جۇزەگە اسىرىلىپ جاتقان ءىس-شارالار بويىنشا قازاقستان رەسپۋبليكاسىنىڭ اۆياسيالىق بيلىگى قابىلداپ جاتقان شارالاردى وڭ قابىلدادى»، - دەلىنگەن اقپاراتتا.
ەۋروپالىق كوميسسيا دەلەگاسياسىنىڭ باسشىسى 2019 جىلدان باستاپ قازاقستاندا ىسكە اسىرىلىپ جاتقان ازاماتتىق اۆياسيانى رەتتەۋدىڭ ەۋروپالىق مودەلىن جوعارى باعالاپ قولدادى جانە بۇل ۇشۋ قاۋىپسىزدىگىنىڭ ەۋروپالىق ستاندارتتارىنا تولىق سايكەس كەلەتىن الەمدەگى ەڭ وزىق جانە ەڭ ءتيىمدى تاسىلدەردىڭ ءبىرى بولىپ تابىلاتىنىن اتاپ ءوتتى. سونداي-اق قازاقستاندا تۇراقتى اۆياسيالىق رەتتەۋشىنىڭ جۇمىس ىستەۋى جانە ەلدەگى ۇشۋ قاۋىپسىزدىگىن قامتاماسىز ەتۋ جونىندەگى مىندەتتەمەلەردى ورىنداۋ ءۇشىن ءقاا رەسۋرستارىن قارجىلاندىرۋ مەن قامتاماسىز ەتۋدىڭ جاڭا تەتىگىن ءتيىمدى ىسكە اسىرۋ قاجەتتىگى اتاپ ءوتىلدى.
سونداي-اق، ەۋروكوميسسيا ۇشۋعا جارامدىلىق، ۇشۋدى پايدالانۋ، اۋە پەرسونالىن ليسەنزيالاۋ، ۇشۋ قاۋىپسىزدىگى باسقارماسى، ءقاا پروسەستەرىن ستاندارتتاۋ جانە ۇيىمنىڭ جاڭارتىلعان قۇرىلىمى سالالارىندا اتقارىلعان جۇمىستاردىڭ بارىسىن وڭ باعالاپ، وسى باعىتتاعى جۇمىستى جالعاستىرۋعا شاقىردى. ەۋروپالىق تاراپ وسى ماسەلەلەردە جان-جاقتى قولداۋ كورسەتۋگە دايىن ەكەندىگىن ءبىلدىردى.
قازاقستاننىڭ اۆياسيالىق بيلىكتەرى ۇسىنعان پروگرەسس نەگىزىندە ەۋروپالىق كوميسسيا وكىلدەرى بۇگىنگى كۇنى قازاقستاندىق اۆياكومپانيالاردا ەۋروكوميسسيانىڭ ۇشۋ قاۋىپسىزدىگى تىزىمىنە («قارا ءتىزىم») جانە ەۋروپاعا ۇشۋعا قانداي دا ءبىر شەكتەۋلەر ەنگىزۋ بويىنشا قاۋىپتەر جوق ەكەنىن راستادى.