فۋتبولدان 2024 جىلعى ەۋروپا چەمپيوناتىنا ىرىكتەۋ ساتىسىندا قازاقستان قۇراماسى سولتۇستىك يرلانديامەن كەزدەستى
كەزدەسۋ بارىسىندا قوس قۇراما جىلدام گول سوعۋعا تىرىستى. دەسە دە، قاقپانى ءدال كوزدەي العان جوق. قازاقستاندىق فۋتبولشىلار قاتارىنان ماكسيم سامورودوۆ ءوز مۇمكىندىگىن قۇر جىبەرىپ الدى. ەسەپتى وزگەرتەتىن مۇنداي ساتتەر سولتۇستىك يرلانديا قۇراماسىندا دا بولدى.
ەكىنشى كەزەڭدە دە تارتىستى ويىن جالعاستى. ماچتىڭ 88-مينۋتىندا ابات ايىمبەتوۆ ۇلتتىق قۇراما ساپىنداعى سەگىزىنشى گولىن سوقتى.
وسىلايشا قازاقستان قارسىلاسىنان 1:0 ەسەبىمەن باسىم ءتۇسىپ، تۋرنير كەستەسىندە ەكىنشى ورىنعا كوتەرىلدى.
سونداي-اق ەل قۇراماسى سىنعا تۇسەتىن H توبىندا فينليانديا سان-مارينونى 6:0 ەسەبىمەن تىزە بۇكتىرسە، سلوۆەنيا مەن دانيا 1:1 ەسەبىنە قاناعات ءبىلدىردى.
ەندى قازاقستاندىق فۋتبولشىلار الداعى ويىنىن 7 قىركۇيەكتە ءوز الاڭىندا فينلياندياعا قارسى وتكىزەدى.
