قازاقستاندىق فۋتبولشىلار دانيا قۇراماسىن جەڭدى
فۋتبولدان 2024 جىلعى ەۋروپا چەمپيوناتىنىڭ ىرىكتەۋ ساتىسىنىڭ توپتىق كەزەڭىندەگى ەكىنشى تۋر ويىنى اياقتالدى. ويىن الاڭىندا قازاقستان مەن دانيا قۇرامالارى كەزدەستى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
«استانا ارەنا» ستاديونىندا وتكەن كەزدەسۋ 3:2 ەسەبىمەن قازاقستاندىقتاردىڭ سەنساسيالىق جەڭىسىمەن اياقتالدى.
ءبىرىنشى تايمدا دانيا قۇراماسىنىڭ تولىعىمەن باسىمدىق تانىتقانىن ايتا كەتۋ كەرەك. راسمۋس ءحويلۋننىڭ قوس گولىنان كەيىن دانيالىقتار ەسەپ ايىرماسىن ۇزارتىپ، تايم 0:2 ەسەبىمەن اياقتالدى.
ەكىنشى كەزەڭدە قازاقستان قۇراماسى باسىمدىققا يە بولىپ، الاڭعا ۇستەمدىك ەتە باستادى. 73-مينۋتتا باكتيور زاينۋتدينوۆ پەنالتي ارقىلى 1:2 ەسەبىنە قول جەتكىزىپ، الاڭ يەلەرىنە ءۇمىت وتىن سىيلادى.
سودان كەيىن 87-مينۋتتا اسحات تاعىبەرگەن دوپتى پەتەر شمەيحەل قاقپاسىنىڭ الىس بۇرىشىنا ءبىر-اق ءتۇسىرىپ، ەسەپتى تەڭەستىردى.
ال نەگىزگى ۋاقىت اياقتالعان 90-مينۋتتا قازاق فۋتبولشىلارى تاعى ءبىر سەنساسيا جاساپ، ءۇشىنشى جەڭىس گولىن سوقتى. ابات ايىمبەتوۆتىڭ باسپەن سوققان گولى جۇرتتى ءتانتى ەتتى.
وسىلايشا، 3:2 ەسەبىمەن باسىم تۇسكەن قازاقستان قۇراماسى 17 ماۋسىمدا سان-مارينو قۇراماسىمەن سىرت الاڭدا وينايدى دەپ جوسپارلانىپ وتىر.
ايتا كەتسەك، بۇعان دەيىن دانيا قۇراماسىمەن 4 مارتە كەزدەسىپ، بارىندە جەڭىلىسكە ۇشىراپ كەلگەن قازاقستان قۇراماسىنىڭ بۇل جەڭىسى قازاقستاندىق جانكۇيەرلەر ءۇشىن ۇلكەن قۋانىش ەكەنى راس. الەۋمەتتىك جەلىلەردە وتانداستىرىمىزدىڭ وسى تاريحي جەڭىسكە قۋانعان ءساتى تۇسىرىلگەن بەينەجازبالار كوپتەپ تاراپ جاتىر.
سونىڭ ءبىرى – استاناداعى №40 اۆتوبۋس جولاۋشىلارىنىڭ ۆيدەوسى. ۆيدەودان ەكى ەل فۋتبولشىلارىنىڭ ويىنىن قوعامدىق كولىكتەگى شاعىن تەلەديداردان تاماشالاعان جانكۇيەرلەردىڭ جەڭىستى ساتتە قالاي قۋانعانىن كورۋگە بولادى. اۆتوبۋس جولاۋشىلارى قۋانىشتان «قازاقستان! قازاقستان! قازاقستان!» دەپ ايعايلاپ، ارتىنشا ءبىراۋىزدان ەسكەندىر حاسانعالييەۆتىڭ «اتامەكەن» ءانىن شىرقادى.
جەلى قولدانۋشىلارى بەينەجازبا استىنا «جارايسىڭدار! قازاق ەلىنىڭ وسىنداي قۋانىشتى ءساتى كوپ بولسىن!»، «ەلى ءۇشىن شىن جۇرەكتەن قۋانا بىلەتىن وسىنداي پاتريوت جاستارىمىز قۋانتادى»، «قانداي اسەرلى كورىنىس!» دەپ سۇيسىنگەن پىكىر قالدىرىپ جاتىر.