اۋدانداعى بارلىق كوپ قاباتتى ۇيلەردىڭ جارتىسى ەسكىرگەن، بۇل قالانىڭ بارلىق ەسكى قورىنىڭ 40%ء-ىن قۇرايدى.
بۇگىنگى كۇنى جەكە قۇرىلىس سالۋشىلار 17 كوپ پاتەرلى تۇرعىن ءۇي سالىپ جاتىر، ولارعا ەسكى ۇيلەردىڭ تۇرعىندارى كوشىرىلەدى، دەپ حابارلايدى Almaty-akshamy.kz.
بۇل تۋرالى الماتى اكىمى ەربولات دوسايەۆ تۇركسىب اۋدانى تۇرعىندارىمەن وتكەن كەزدەسۋدە ايتتى.
«وسيپەنكو كوشەسىندە 59 پاتەرلىك 2 كوپ پاتەرلى تۇرعىن ءۇيدىڭ قۇرىلىسى اعىمداعى جىلدىڭ سوڭىنا دەيىن اياقتالادى. وندا ءبىز چەرنىشيەۆسكيي – ساۋرانبايەۆ – مولداعالييەۆ – تولستوي كوشەلەرىنىڭ شارشىسىندا ورنالاسقان 4 ەسكى ءۇيدىڭ تۇرعىندارىن ۋاقىتشا كوشىرمەكپىز. بۇل بىزگە كەلەسى جىلى وسى 4 ءۇيدى بۇزىپ، 214 پاتەرلىك 10 ءۇيدىڭ قۇرىلىسىن باستاۋعا مۇمكىندىك بەرەدى.
وسى كوشەلەردىڭ شارشىسىندا 152 پاتەرلىك 7 كوپ پاتەرلى تۇرعىن ءۇي سالىنۋدا، ونىڭ ىشىندە ەسكى ۇيلەردى جاڭارتۋ باعدارلاماسى بويىنشا 48 پاتەر اينالىمداعى تۇرعىن ۇيگە ارنالعان. بۇل ۇيلەر 2023 جىلعى مامىردا پايدالانۋعا بەرىلەدى. اتالعان نىساندار اياقتالعاننان كەيىن ءبىز سپارتاك، اقىندار كوشەسىندەگى تاعى 8 ءۇيدىڭ تۇرعىندارىن كوشىرۋدى جوسپارلاپ وتىرمىز»، - دەدى قالا اكىمى ەربولات دوسايەۆ.
كاسسين، كوتەلنيكوۆ كوشەلەرى، سەيفۋللين داڭعىلىنىڭ شارشىسىندا 432 پاتەرگە 8 كوپ پاتەرلى تۇرعىن ءۇي قۇرىلىسى ءجۇرىپ جاتىر. ۇيلەر 2023 جىلدىڭ شىلدە ايىندا تاپسىرىلادى. وندا اتالعان شارشىداعى 15 ەسكى ءۇيدىڭ تۇرعىندارى كوشىرىلەدى.
بۇدان باسقا، جەكە قۇرىلىس سالۋشىمەن («Elif Construction» ج ش س) «التاي-2» شاعىناۋدانىنداعى ەكى قاباتتى 57 ءۇيدى رەنوۆاسيالاۋ بويىنشا مەموراندۋم جاسالدى. قونىس اۋدارۋشىلارعا 456 پاتەر بەرىلەدى. 2023 جىلى ءى كەزەڭدە 18 ەسكى ءۇيدىڭ تۇرعىندارىن كوشىرۋ ءۇشىن 2 تۇرعىن ءۇي سالىناتىن بولادى.
«سونىمەن قاتار، مەن ايتقان جوسپارلاردى ىسكە اسىرۋ ەسكى ۇيلەردىڭ بارلىق 100% تۇرعىندارىنىڭ كەلىسىمىمەن عانا مۇمكىن بولاتىندىعىن قايتالاعىم كەلەدى»، - دەدى قالا باسشىسى.