«جول كارتاسى اياقتالدى، ءبىز ورىندالۋىن قاداعالاپ جاتىرمىز. تالاپتاردى ورىنداماعان بازارلار جويىلادى»، -دەدى ارمان شاققالييەۆ
ول بۇگىندە بازارلارعا قاتىستى سۇراقتار تۋىنداپ وتىرعانىن ايتتى. سونىڭ ىشىندە الماتىنىڭ «التىن وردا» بازارىندا مونيتورينگتىك توپتىڭ، باس پروكۋراتۋرانىڭ، ىشكى ىستەر مينيسترلىگىنىڭ قاتىسۋىمەن كۇردەلى تەكسەرۋ ءجۇرىپ جاتىر.
«ءبىز ءار بازارمەن وسىنداي جۇمىس ىستەيمىز. بازاردىڭ جاعدايى باعانىڭ كوتەرىلۋىنە جانە سالىق سالۋ بازاسىنا تىكەلەي جاۋاپ بەرەدى. بۇگىندە اتاپ ايتقاندا، الماتىدا 26 بازار جاڭعىرتۋ جۇمىستارىنىڭ جوسپارىنا تارتىلعان. ەڭ اۋەلى، بۇل بازارلاردا باقىلاۋ-كاسسالىق ماشينالارى، جالعا بەرۋ كەلىسىم-شارتتارىن ساقتاۋ، اۆتوتۇراققا كىرۋدەن باستاپ ءتۇرلى انىقتاما بەرۋگە دەيىن قوسىمشا تولەمدەردى الىپ تاستاۋعا جاعداي جاسالۋى ءۇشىن ايتىپ وتىرمىز»، -دەدى ساۋدا جانە ينتەگراسيا ۆيسە-مينيسترى.
ۆيسە-مينيستر دەپۋتاتتاردىڭ قولداۋىنىڭ ارقاسىندا 2022 جىلى زاڭ جوباسى اياسىندا پرەزيدەنتتىڭ جەكەلەگەن تاپسىرماسىمەن كوتەرمە ساۋدا ايماعىن بولشەك ساۋدا ايماعىنان ءبولۋ، قوسىمشا شىعىندى الىپ تاستاۋ جانە ساۋدا ورىندارىن جالعا بەرۋدىڭ ناقتى مەحانيزمى تۋرالى ەرەجەنىڭ بولۋىن كوزدەيتىن وزگەرىستەر ەنگىزىلگەنىن ايتتى.
«شىمكەنتتە دە بازارلار تۋرالى تۇسىنىك بار. تالاپقا ساي كەلمەيتىن ءبىرقاتار بازار بەلگىلى. ولاردى سايكەستەندىرۋدىڭ مەرزىمى مەن ناقتى شارالارى قاراستىرىلعان»، -دەدى ا.شاققالييەۆ ۇكىمەت ساعاتىندا.
2022 جىلدىڭ اقپان ايىندا قاسىم-جومارت توقايەۆ «التىن وردا» بازارىندا ءتارتىپ ورناتۋدى تاپسىردى. سودان كەيىن ول «بۇل جەر الىپساتارلاردىڭ ىڭعايلى ورتاسىنا اينالعانىن» ايتتى.
1 ماۋسىمدا باس پروكۋراتۋرا «التىن وردا» بازارىنىڭ قىزمەتىندە قازاقستاننىڭ 300-دەن استام زاڭناماسىن بۇزۋ فاكتىسىن انىقتادى.
10 ماۋسىمدا «التىن وردا» بازارىن ۇكىمەتتىك توپ تاۋلىك بويى تەكسەرىپ جاتقانى بەلگىلى بولدى. كەيىن ساۋدا مينيسترلىگىنىڭ بايلانىس ورتالىقتارى مەن Telegram چاتتارىنا «التىن وردا» بازارىنىڭ جۇمىسىنا قاتىستى 200-دەن استام شاعىم تۇسكەنى حابارلاندى.