جاڭا سالىق كودەكسىنىڭ جوباسىن تانىستىرعان ۇلتتىق ەكونوميكا ۆيسە-مينيسترى ازامات ءامرين 10 جىلدان اسقان اۆتوكولىكتەر ءۇشىن سالىق سوماسى 30%-عا، 20 جىلدان اسقان اۆتوكولىكتەر ءۇشىن – 50%-عا تومەندەيتىنىن ايتتى، دەپ حابارلايدى aqshamnews.kz.
«جاڭا سالىق كودەكسىندە بجزق-دان زەينەتاقى تولەمدەرىن جەكە تابىس سالىعىنان بوساتۋ جونىندەگى نورما كوزدەلگەن. سونداي-اق، قولدانۋى 10 جىلدان اسقان اۆتوموبيلدەر ءۇشىن سالىق سوماسى 30%-عا، 20 جىلدان اسقان اۆتوموبيلدەر ءۇشىن – 50%-عا تومەندەتىلەتىن بولادى»،- دەدى مينيسترلىك وكىلى.
سونىمەن بىرگە بۇرىننا تالقىلانىپ كەلە جاتقان «ءسان-سالتانات» زاتتارىنا جوعارى سالىق سالۋ جونىندەگى مىندەتتەردى ىسكە اسىرۋ ءۇشىن جاڭا تەتىكتەر ۇسىنىلعان. ولار كەلەسىدەي:
- جيىنتىق قۇنى 450 ملن تەڭگەدەن اساتىن جىلجىمايتىن مۇلىك وبەكتىلەرى بويىنشا مۇلىك سالىعىنىڭ جوعارى مولشەرلەمەسى ارتادى؛
- كەدەندىك قۇنى 75 ملن تەڭگەدەن اساتىن جەڭىل اۆتوموبيلدەرگە اكسيزبەن قوسىمشا سالىق سالىنادى؛
- قىمبات الكوگول جانە تەمەكى ونىمدەرىنە، سونداي-اق قىمبات تەڭىز كەمەلەرىنە، ۇشۋ اپپاراتتارىنا اكسيزبەن قوسىمشا سالىق سالىنادى.
سونىمەن بىرگە شاعىن بيزنەسكە قاتىستى ارناي سالىق رەجيمدەرىن رەفورمالاۋ كوزدەلگەن. جاڭا جوبادا ول رەجيمدەر وڭتايلاندىرىلىپ، تەك 3 رەجيم قالادى.
ءبىرىنشىسى – ءوزىن-وزى جۇمىسپەن قامتىعاندار ءۇشىن جاڭا جەڭىلدىكتى رەجيم ۇسىنىلادى، وندا جتس مولشەرلەمەسى نولگە تەڭ. تابىستىڭ شەكتى ءمانى – جىلىنا 15 ملن تەڭگەدەن اسپايدى. جەكە كاسىپكەر رەتىندە تىركەلۋ قاجەت ەمەس. مولشەرلەمە اينالىمنان 4%. ولار 2% – مجا، 1% – ءامسم، 1% – ءاسمق.
ەكىنشىسى – وڭتايلاندىرعان دەكلاراسيا نەگىزىندەگى اسر. ءماسليحاتتاردىڭ مولشەرلەمەسى 2%-عا دەيىن تومەندەتۋ قۇقىعىن ساقتاي وتىرىپ، ۆ2س وپەراسيالارى ءۇشىن 4%-دىق مولشەرلەمە، سونداي-اق ۆ2ۆ وپەراسيالارى ءۇشىن 12%-دىق مولشەرلەمە. ال اينالىم بويىنشا ۇسىنىلاتىن شەكتى ءمان – جىلىنا 600 مىڭ اەك. وسى اسر قولدانۋ ءۇشىن قىزمەت تۇرلەرىنە تىيىم سالۋ ءتىزىمى ۇسىنىلادى.
«جۇمىسشىلار سانى شەكتەلمەيدى. سونداي-اق، وسى رەجيمدى قولداناتىن سالىق تولەۋشىلەر ققس تولەمەيدى»- دەيدى ءامرين.
ءۇشىنشى رەجيم – شارۋا جانە فەرمەر قوجالىقتارى ءۇشىن رەجيمدى سول كۇيىندە ساقتاۋ ۇسىنىلادى. تەك ءبىرىڭعاي جەر سالىعىنىڭ ورنىنا جتس تولەنبەك. وسى رەجيم ءۇشىن ءتيىمسىز پايدالانىلعان جەرلەر بويىنشا جەر سالىعىن بازالىق مولشەرلەمەدەن 40 ەسە مولشەردە ەنگىزۋ ۇسىنىلعان.