«Almaty Ustazy» بايقاۋى بيىل ءتورتىنشى مارتە ءوتىپ جاتىر. الماتى قالاسى اكىمدىگىنىڭ قولداۋىمەن، «ءبىلىمدى ۇلت» ساپالى ءبىلىم بەرۋ» ۇلتتىق جوباسىنىڭ ماقساتتارى مەن مىندەتتەرىنە سايكەس وتكىزىلىپ جاتقان بايقاۋدىڭ ماقساتى – پەداگوگتەردىڭ تالانتى مەن شىعارماشىلىق الەۋەتىن انىقتاۋ، وزىق پەداگوگيكالىق تاجىريبەنى تاراتۋ، پەداگوگ مارتەبەسىن ارتتىرۋ.
ءيا، «Almaty Ustazy» تالانتتى جانە شىعارماشىلىقپەن جۇمىس ىستەيتىن جاس مۇعالىمدەردى انىقتاۋعا جانە قولداۋعا، پەداگوگتەردىڭ بەدەلىن كوتەرۋگە جانە ناسيحاتتاۋعا باعىتتالعان. مۇنداي بايقاۋ قالانىڭ جاس پەداگوگتەرى اراسىندا وزەكتى جانە سۇرانىسقا يە، ويتكەنى بۇل الاڭدا كوپتەگەن پايدالى اقپارات الۋعا، جاڭا ادىستەر مەن تەحنولوگيالار تۋرالى بىلۋگە، بىلىمدەرى مەن قابىلەتتەرىن كورسەتۋگە جانە تەكسەرۋگە بولادى.
سونىمەن، «Almaty Ustazy» بايقاۋى 3 كەزەڭدە وتۋدە. بيىل وعان 1513 جاس پەداگوگ تىركەلىپ، 780 ءمۇعالىم ءوز ماتەريالدارىن جۇكتەدى. ءبىرىنشى كەزەڭ ونلاين رەجيمىندە «Almaty Ustazy» بايقاۋىنىڭ uzdikustaz-nobd.edu.kz ەلەكتروندىق پلاتفورماسىندا ءوتتى. وندا 11 وقۋ ءپانى بويىنشا 158 مەكتەپتەن 780 پەداگوگ ءوز جۇمىستارىن ۇسىندى. قاتىسۋشىلاردىڭ جۇمىسىن 70 ساراپشى باعالادى. بايقاۋدىڭ ىرىكتەۋ قورىتىندىسى بويىنشا ەكىنشى كەزەڭگە ساراپشىلار ءارتۇرلى پاندەر بويىنشا 110 قاتىسۋشىنى جىبەردى. ولار بيىلعى مامىردا 20 مەكتەپ بازاسىندا بايقاۋ ساباقتار وتكىزدى.
– ەندى ءۇشىنشى، قورىتىندى كەزەڭ 20 قىركۇيەكتە الاتاۋ اۋدانىنىڭ يننوۆاسيالار جانە شىعارماشىلىق ورتالىعىندا وتەدى. وندا قالانىڭ وزا شاپقان ۇزدىك 12 پەداگوگى 11 وقۋ ءپانى بويىنشا وزدەرىنىڭ جوبالىق جۇمىستارىن ۇسىنادى. سوڭعى كەزەڭ ەكى بولىمنەن تۇرادى، ياعني «مەن – ءمۇعالىم كوشباسشىمىن» جوباسىن قورعاۋ جانە «قازىرگى ءبىلىم بەرۋدىڭ وزەكتى مىندەتتەرى» تاقىرىبىنداعى پىكىرتالاس. سوڭعى كەزەڭدى ءپان بويىنشا كوميسسيا ءتوراعالارى جانە الماتى قالاسى ءبىلىم باسقارماسىنىڭ باسشىسى سايفەدەنوۆ سايران تاپەن ۇلى باعالايتىن بولادى. فيناليستەردىڭ التى جەڭىمپازى حالىقارالىق ءبىلىم بەرۋ تاعىلىمداماسىنا بارا الادى، وندا مەكتەپتەردىڭ جۇمىسىمەن تانىسادى جانە شەتەلدىك ءبىلىم بەرۋ مەكەمەلەرىنىڭ جۇمىسىندا پراكتيكالىق تاجىريبە جيناقتايدى، – دەيدى الماتى قالاسى ءبىلىم باسقارماسىنىڭ وكىلى داۋلەت بايسۇلتانوۆ.
جەڭىمپازدار مۇعالىمدەر كۇنىنە وراي 4 قازاندا رەسپۋبليكا سارايىندا سالتاناتتى جاعدايدا ماراپاتتالادى. ال گران-پري يەگەرىنە 5 000 000 تەڭگەنىڭ سەرتيفيكاتى تابىستالادى.