ەگەر اۆتوكولىك 20 جىلدان استام ۋاقىت پايدالانىلىپ كەلسە، سالىقتىڭ جارتىسىن تولەيدى.
ەندى 20 جىلدان ارتىق پايدالانىلعان كولىكتەرگە سالىق ازايادى.
قارجى ۆيسە-مينيسترى ەرجان ءبىرجانوۆتىڭ سوزىنشە، جاڭا سالىق كودەكسىندە ەسكى كولىكتەرگە سالىق مولشەرىن ازايتۋ تۋرالى نورما بار، دەپ حابارلايدى aqshamnews.kz
– ارينە، جوبادا ۇسىنىلعان وسى نورما ساقتالدى. ەگەر اۆتوكولىك 20 جىلدان استام ۋاقىت پايدالانىلىپ كەلسە، سالىقتىڭ جارتىسىن تولەيدى. ال 10 جىلدان اسقان اۆتوكولىكتەرگە سالىق 30 پايىزعا ازايادى، – دەپ ناقتىلادى ەرجان ءبىرجانوۆ.
قارجى ۆيسە-مينيسترى قازىرگى ۋاقىتتا ەلدى مەكەندەر مەن شالعاي اۋىلداردا ەسكى كولىكتەردىڭ كوپ ەكەنىن جاسىرمادى.
– وسى تۇرعىنداردىڭ سالىق جۇكتەمەسىن جەڭىلدەتۋ ءۇشىن مۇنداي نورمالاردى ەنگىزىپ وتىرمىز. بۇل نورما قوزعالتقىش كولەمى ۇلكەن نەمەسە شاعىن كولىكتەردىڭ بارلىعىنا قاتىستى. جول تالعامايتىن (جوعارى سالىق تولەيتىن) كولىكتەر دە قامتىلادى، ياعني 20 جىلدان اسسا، 50 پايىزىن تولەيدى، – دەپ قوسا كەتتى ۆيسە-مينيستر.