ەسكى دە جاڭا «الىپپە» ەرتەڭ قولعا تيەدى

حالىقتىڭ سۇراۋىمەن، مەملەكەتتىڭ ماقۇلداۋىمەن بيىل «الىپپە» قايتا ورالدى. 

بۇدان بۇرىن ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ «الىپپەنىڭ»  احمەت بايتۇرسىن ۇلىنىڭ 1912 جىلى شىققان وقۋلىعىنىڭ تۇپنەگىزىندە جاسالاتىنىن ايتقان بولاتىن، دەپ حابارلايدى Almaty-akshamy.kz 

جاڭا وقۋلىقتا ۇلت ۇستازىنىڭ كىتابىندا ۇستانعان دىبىستىق ءادىس يدەياسى بار ەكەن. ونداعى ارىپتەردىڭ ورنالاسۋى وڭايدان قيىنعا باعىتتالعان. ەندى بالالار سويلەم قۇراۋدى وڭاي يگەرە الۋى ءتيىس. جاڭا وقۋلىقتاعى ارىپتەردىڭ رەتى وزگەرگەن. العاشقى «ا» ارپىنەن كەيىن بۇرىنعىداي «ب» ەمەس، «ر» ءارپى تۇرادى. سەبەبى احمەت بايتۇرسىن ۇلى بالاعا اۋەلى «ار» ءسوزىن ۇيرەتۋ ماڭىزدى دەگەن.

جاڭارتىلعان الىپپەدە زاماناۋي تەحنولوگيا دا ەسكەرىلگەن. وقۋلىقتىڭ ءار بەتىندە QR-كود بار. ونى سكانەرلەپ، اۋديوجازبالار تىڭداۋعا دا مۇمكىندىك بار. ءتىپتى تاپسىرمالار دا جالپىلاما بەرىلمەي، وقۋشىعا قوسىمشا رەتىندە ارنايى ديسكتە ۇسىنىلادى. 

جاڭارعان وقۋلىقتىڭ العاشقى داناسى مەكتەپ تابالدىرىعىن ەندى اتتاعالى وتىرعان بالالاردىڭ قولىنا ەرتەڭ، ياعني 25 تامىزدا، تيەدى.