ەسىرتكىگە تاۋەلدى ەمەسسىز بە؟

ءقازىر وقۋشىلار اراسىندا دا ەسىرتكى قولدانۋشىلار انىقتالىپ جاتىر.

قازاقستاندىقتاردى ەسىرتكى تاۋەلدىلىگىنە تەكسەرۋ ۇسىنىلدى، دەپ حابارلايدى Almaty-akshamy.kz

ءمينيستردىڭ ايتۋىنشا، ازاماتتار مەملەكەتتىك قىزمەتكە تۇرعاندا، اسكەرگە شاقىرىلعاندا جانە جۇرگىزۋشى كۋالىگىن العاندا سكرينينگتەن ءوتۋى مۇمكىن.

قازاقستاندا ناشاقورلىقپەن كۇرەسۋ ءۇشىن ازاماتتاردى ەسىرتكى تاۋەلدىلىگىنە تەكسەرۋ ۇسىنىلدى. بۇل تۋرالى ىشكى ىستەر ءمينيسترى مارات احمەتجانوۆ مالىمدەدى، دەپ حابارلايدى Sputnik قازاقستان ءتىلشىسى.

ونىڭ ايتۋىنشا، قازىرگى ۋاقىتتا ەسىرتكى قولدانۋ فاكتىلەرى ءتىپتى وقۋشىلار اراسىندا انىقتالىپ جاتىر.

"سوندىقتان بولاشاقتا سكرينينگ وتكىزۋ جۇيەسىن ەنگىزۋدى جوسپارلاپ وتىرمىز. بۇل – قوعامنىڭ ناشاقورلىق دەڭگەيىن وبەكتيۆتى تۇردە باعالاۋعا جانە ەسىرتكىگە تاۋەلدى ادامدى، اسىرەسە، جاسوسپىرىمدەر اراسىندا ەرتە باستان انىقتاۋعا مۇمكىندىك بەرەدى"، - دەدى احمەتجانوۆ ۇكىمەت وتىرىسىندا.

كۋلۋاردا جۋرناليستەر مينيستردەن سكرينينگ جۇيەسى قالاي جۇمىس ىستەيتىنىن سۇرادى.

"ءبىز "پروفوسموتر" كەزىندە بيوماتەريال سكرينينگىن وتكىزۋدى ۇسىنىپ وتىرمىز. بۇل - دەنساۋلىق ساقتاۋ مينيسترلىگىنىڭ ۇسىنىسى، ءبىراق ءبىز ونى قولدايمىز. جوعارى وقۋ ورىندارىنا، مەملەكەتتىك قىزمەتكە قابىلدانعاندا، اسكەرگە شاقىرعاندا، جۇرگىزۋشى كۋالىگىن العاندا بيوماتەريالدار زەرتتەلەدى"، - دەدى احمەتجانوۆ.

ايتۋىنشا، بۇگىندە سينتەتيكالىق ەسىرتكى كەڭ تارالعان جانە قولجەتىمدى. ءبىر دوزاسى 10 مىڭ تەڭگە تۇرادى. ينتەرنەتپەن دە جەتكىزىپ بەرەتىندەر كوپ.

"عىلىمي ساراپتاما ەسىرتكىگە تاۋەلدىلىك ەرتە انىقتالسا، 95%-ى قالىپتى ومىرگە ورالا الاتىنىن كورسەتتى. ال ەگەر ءۇشىنشى كەزەڭدە انىقتالسا، ناشاقورلاردىڭ تەك 15%-ى عانا ەسىرتكىدەن باس تارتادى"، - دەيدى ءىىم باسشىسى.