ەسىرتكىگە ماسايعان اۆتوبۋس جۇرگىزۋشىسى قامالدى

ول 8 جىلعا كولىك قۇرالىن باسقارۋ قۇقىعىنان ايىرىلدى.

الماتىدا اۆتوبۋس جۇرگىزۋشىسى ەسىرتكىگە ماس كۇيىندە جولاۋشىلاردى تاسىمالداعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

بۇل جولى 118ء-شى باعىتتاعى قوعامدىق كولىك جۇرگىزۋشىسى «ەلدەن ەرەكشەلەندى». ونى اباي داڭعىلى مەن وتەگەن باتىر كوشەسىنىڭ قيىلىسىندا اكىمشىلىك تاجىريبە بولىمشەسىنىڭ قىزمەتكەرلەرى توقتاتتى.

«جۇرگىزۋشىنىڭ ارەكەتى كۇدىك تۋعىزدى. ونى مەديسينالىق تەكسەرۋدەن وتكىزۋ ءۇشىن ەرتىپ باردى، ساراپتاما قورىتىندىسى بويىنشا ناركولوگ-دارىگەرلەر ونىڭ ەسىرتكىگە ماس بولعانىن انىقتادى. جۇرگىزۋشى بىردەن قوعامدىق كولىكتى باسقارۋدان شەتتەتىلدى. الماتى قالاسى بويىنشا مامانداندىرىلعان اۋدانارالىق اكىمشىلىك سوتىنىڭ شەشىمىمەن ەر ادام 8 جىل مەرزىمگە كولىك قۇرالىن باسقارۋ قۇقىعىنان ايىرىلدى، سونىمەن قاتار 15 تاۋلىككە اكىمشىلىك قاماققا الىندى. قوعامدىق كولىك مامانداندىرىلعان ايىپپۇل تۇراعىنا قويىلدى»، - دەدى اكىمشىلىك پوليسيا باسقارماسى باستىعىنىڭ ورىنباسارى داۋلەت سەيىتقۇلوۆ.

سونداي-اق، ەسىرتكىگە ماساڭ كۇيدەگى جۇرگىزۋشىنى قاتارعا شىعارۋعا رۇقسات بەرگەن اۆتوكاسىپورىننىڭ مەديسينا قىزمەتكەرىنە قاتىستى ق ر اقبك-نىڭ 619-بابىنا سايكەس اكىمشىلىك شارا قولدانىلدى. ايىپپۇل سوماسى 150 مىڭ تەڭگەنى قۇرادى.