الماتىداعى ءىرى ەسىرتكى زەرتحاناسىنىڭ ۇيىمداستىرۋشىسى 11 جىلعا باس بوستاندىعىنان ايىرىلدى، دەپ حابارلايدى almaty-akshamy.kz Polisia.kz-كە سىلتەمە جاساپ.
2020 جىلدىڭ تامىز ايىندا ناۋرىزباي اۋدانىنىڭ اۋماعىندا ورنالاسقان باۋ-باقشا قوعامداستىعىنىڭ بىرىندە ەسىرتكى زەرتحاناسى انىقتالدى.
– ەسىرتكى زەرتحاناسىنا اينالدىرىلعان ءۇيدىڭ ىشىندە سينتەتيكالىق پرەپاراتتى شىعارۋعا ارنالعان ءتۇرلى كولبالار مەن ارنايى قوندىرعىلار تابىلدى جانە تاركىلەندى. سونداي-اق دايىن ءونىم – “مەفەدرون” پسيحوتروپتى زاتتارى مەن اسا اۋقىمدى كولەمدە ا-PVP تاركىلەندى، – دەدى الماتى قالاسى پد تەرگەۋ باسقارماسى باستىعىنىڭ ورىنباسارى ءادىل سالايەۆ.
بەلگىلى بولعانداي، سينتەتيكالىق ەسىرتكى ءوندىرىسى ءۇشىن قولدانىلاتىن زاتتار مەن زەرتحانالىق قوندىرعىلاردان تۇراتىن جۇكتىڭ الماتىداعى كولىك-لوگيستيكالىق كومپانيالاردىڭ بىرىنە جەتكىزىلۋى پوليسيانىڭ نازارىن اۋدارتتى. “جۇكتىڭ” تاپسىرىس بەرۋشىسى 45 جاستاعى ك.ەسىمدى ەر ادام بولىپ شىقتى.
جۇرگىزىلگەن ارنايى ءىس-شارالار ونىڭ زاڭسىز ارەكەتىن جانە ەسىرتكى زەرتحاناسىن انىقتادى. ەر ادام ۇستالدى جانە سوت ونى ق ر قك-نىڭ 297-بابى 3-بولىگى 3-تارماعى (اسا ءىرى كولەمدە پسيحوتروپتىق زاتتى ساتۋ ماقساتىندا زاڭسىز دايىنداۋ جانە ساقتاۋ) بويىنشا قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىدى. ول 11 جىلعا باس بوستاندىعىنان ايىرىلدى.