مەملەكەت باسشىسى ەسىرتكى تۇتىنۋشىلاردىڭ كوبەيۋى ۇلت ساۋلىعىنا زور ءقاۋىپ ءتوندىرىپ وتىرعانىن، وسىعان بايلانىستى ەسىرتكى زاتتارىن تاراتۋعا قارسى كۇرەس جۇمىستارى جالپىۇلتتىق دەڭگەيدە جۇرگىزىلۋى ءتيىس ەكەندىگىن اتاپ ايتتى.
سايكەسىنشە، ناشاقورلىقپەن جانە ەسىرتكى ساۋداسىمەن كۇرەسۋ جۇمىستارىن جانداندىرۋدى مىقتاپ تاپسىردى. وسى ورايدا، شىمكەنت قالاسى پوليسيا دەپارتامەنتى مەملەكەت باسشىسى پەن ىشكى ىستەر مينيسترلىگىنىڭ تاپسىرماسىنا سايكەس، قالا اۋماعىندا ەسىرتكىمەن بايلانىستى قۇقىق بۇزۋشىلىقتاردى انىقتاۋ جانە ولاردىڭ جولىن كەسۋ باعىتىنداعى جۇمىستاردى كۇشەيتتى، دەپ حابارلايدى Almaty-akshamy.kz.
Polisia.kzء-تىڭ اقپاراتى بويىنشا، قابىلدانعان شارالار ناتيجەسىندە، ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جىل باسىنان باسقالالاردىڭ ءومىرى مەن دەنساۋلىعىنا ءقاۋىپ ءتوندىرىپ وتىرعان زۇلىم زاتتاردى قالامىزدا تاراتىپ جۇرگەن ءبىرقاتار قىلمىسكەرلەردى قۇرىقتادى.
كەزەكتى ءىس-شارا بارىسىندا پوليسيا قىزمەتكەرلەرىنىڭ نازارىنا الماتى قالاسىنان كەلگەن جاس جىگىت ءىلىنىپ، قىسقا مەرزىم ىشىندە ونىڭ قىلمىستىق ماقساتى مەن ارەكەتى اشكەرەلەندى. جەكە ءتىنتۋ بارىسىندا الماتىلىق تۇرعىننان 1 پوليەتيلەندى پاكەتكە سالىنعان ەسىرتكىگە ۇقساس زات تاركىلەنىپ الىندى. ساراپتاما قورىتىندىسىنا سايكەس، اتالعان زات سينتەتيكالىق ەسىرتكى ەكەندىگى راستالىپ، جالپى سالماعى 101 گرامدى قۇرادى. ول اسا ءىرى مولشەردەگى ەسىرتكى دەپ ەسەپتەلىنەدى.
اتالعان دەرەك ق ر قك-نىڭ 297-بابى 3-بولىگىمەن (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) تىركەلىپ، سوتقا دەيىنگى تەرگەپ-تەكسەرۋ باستالدى. كۇدىكتى ۋاقىتشا ۇستاۋ يزولياتورىنا قاماۋعا الىندى. پوليسيا قىزمەتكەرلەرى ەسىرتكى زاتتارىمەن بايلانىستى كەز-كەلگەن زاڭسىز ارەكەت قىلمىستىق جاۋاپكەرشىلىككە الىپ كەلەتىنىن جانە ول ءۇشىن باس بوستاندىعىنان ايىرۋ تۇرىندەگى جازا قاراستىرىلعانىن ەسكەرتەدى.