الماتىدا ۆەگەتاسيا باستالدى

 جاسىل جەلەكتى جىل سايىنعى بيولوگيالىق وڭدەۋ جۇمىستارى ءجۇرىپ جاتىر

اعاشتاردىڭ قالىپتى جاعدايىن ساقتاۋ جانە زيانكەستەرگە توزىمدىلىگىن  ارتتىرۋ ماقساتىندا 14 ساۋىردەن باستاپ قالانىڭ جاسىل جەلەگىن بيولوگيالىق وڭدەۋ جۇمىستارى باستالادى، - دەپ حابارلايدى almaty-akshamy.kz

زيانكەستەرگە  وڭدەۋدەن كەيىنگى اسەردى كۇشەيتۋ ءۇشىن بيىلدان باستاپ ءبىرىنشى كەزەڭدە (ۆەگەتاسيا باسىندا) ەمەندەر ءتورت رەت، تەرەكتەر ەكى رەتتەن وڭدەلەتىن بولادى. بۇعان دەيىن ولار ءبىر رەت قانا وڭدەلەتىن، الايدا وڭدەۋ رەتتىلىگى ازدىعىنىڭ ءتيىمسىز ەكەندىگى دالەلدەندى جانە  اعاشتاردى ساقتاپ قالۋعا مۇمكىندىك بەرمەيتىنى انىقتالدى.

جۇمىس بارىسىندا ادامدارعا قۇستار مەن جانۋارلارعا زيانسىز، كليماتتىق ەرەكشەلىكتەردى ەسكەرە وتىرىپ ق ر اۋماعىندا قولدانۋعا رۇقسات ەتىلگەن سەرتيفيكاتتالعان قاۋىپتىلىگى تومەن كلاسسقا جاتاتىن (پ-4) بيولوگيالىق جانە كەيبىر كەزدەردە حيميالىق پرەپاراتتار قولدانىلادى.

جاپىراق كەمىرگىش جانە زەڭ اۋرۋلارىن قوزدىرعىش زيانكەستەرگە قارسى وڭدەۋ جۇمىستارىمەن 2،3 ملن استام اعاشتى قامتۋ جوسپارلانعان. زيانكەستەر مەن اۋرۋلاردىڭ بيولوگيالىق ەرەكشەلىكتەرىنە قاراي وڭدەۋ جۇمىستارى تۇندە جانە تاڭعى ۋاقىتتا جۇزەگە اسىرىلادى. 

بيىل بيولوگيالىق وڭدەۋ جۇمىستارى ادەتتەگىدەي ءتورت كەزەڭمەن جۇرگىزىلەدى: 14 ساۋىردەن 20 مامىرعا دەيىن؛ 30 مامىردان 30 ماۋسىمعا دەيىن؛ 10 شىلدەدەن 10 تامىزعا دەيىن جانە 20 تامىزدان 20 قىركۇيەككە دەيىن.