جەتىسۋ وبلىسىندا "قاراسورا - 2025" جەدەل الدىن الۋ ءىس-شاراسى اياسىندا پوليسيا قىزمەتكەرلەرى ەسىرتكى تاسىمالداۋ جانە وتكىزۋمەن اينالىسقان قىلمىستىق توپتىڭ جولىن كەستى، - دەپ حابارلايدى Aqshamnews.kz.
جەدەل تۇردە الماتى قالاسىنان جەتكىزۋ تىزبەگى انىقتالدى. الماتى – وسكەمەن اۆتوجولىندا پوليسەيلەر 65 جاستاعى ەر ادام مەن ونىڭ Toyota كولىگىن تىزگىندەگەن 29 جاستاعى ۇلىن ۇستادى. اۆتوكولىكتىڭ سالونىنان 19 كەلى ماريحۋانا تاركىلەندى. تەرگەۋ بارىسىندا كۇدىكتىنىڭ ۇلى ەسىرتكىنى جامبىل وبلىسىنىڭ 29 جاستاعى تۇرعىنىنان العانىن ايتتى. كەيىنگى شارالار بارىسىندا كۇدىكتىنىڭ 66 جاستاعى جۇبايى دا انىقتالدى. ول تەلەفون ارقىلى كۇيەۋى مەن ۇلىنىڭ ىس-ارەكەتىن ۇيلەستىرىپ، الماتى مەن جەتىسۋعا ەسىرتكى جەتكىزىپ وتىرعان. ونىڭ تۇرعىلىقتى جەرىنەن تاعى 1 كەلى ماريحۋانا تابىلدى. وبلىستىق پروكۋراتۋرامەن بىرلەسكەن ءىس-قيمىل ناتيجەسىندە وبلىس اۋماعىندا جەتكىزۋدى ۇيىمداستىرعان كۇدىكتى ۇستالدى.
جامبىل وبلىسىنداعى ونىڭ قوجالىعىنان 10 كەلىدەن استام كەپتىرىلگەن ماريحۋانا تاركىلەندى. بارلىق قاتىسۋشى قاماۋعا الىندى، سوتقا دەيىنگى تەرگەۋ جالعاسۋدا. پوليسيا ەسىرتكىنى زاڭسىز ساتىپ الۋ، ساقتاۋ جانە وتكىزۋ ءۇشىن 7 جىلدان 12 جىلعا دەيىن باس بوستاندىعىنان ايىرۋ جازاسى جانە مۇلكىن تاركىلەۋ كوزدەلگەنىن ەسكە سالادى.