ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا وسى جىلدىڭ قاڭتار-مامىر ايلارىنداعى قازاقستاننىڭ الەۋمەتتىك-ەكونوميكالىق دامۋى جانە رەسپۋبليكالىق بيۋدجەتتىڭ اتقارىلۋ قورىتىندىلارى قارالدى،دەپ حابارلايدى Almaty-akshamy.kz.
ەسەپتى كەزەڭدە رەسپۋبليكا ەكونوميكاسى 4،5%-عا ءوستى.
بەس ايدىڭ قورىتىندىسى بويىنشا وڭدەۋ ونەركاسىبى سالالارى رەسپۋبليكا ەكونوميكاسىنىڭ وسۋىنە نەگىزگى ۇلەستى قوسىپ وتىر.
اتاپ ايتقاندا، ماشينا جاساۋدا – 32%، ونىڭ ىشىندە اۆتوموبيل جاساۋدا – 41%، سونداي-اق جەڭىل ونەركاسىپتە – 31% ءوسۋ ديناميكاسى تىركەلدى. نەگىزگى كاپيتالعا سالىنعان ينۆەستيسيانىڭ ءوسۋ قارقىنى 17،2%-دى قۇرادى. جالپى ەسەپتى كەزەڭدە بارلىق نەگىزگى ماكروكورسەتكىشتەردىڭ ءوسىمى اباي، اقمولا، باتىس قازاقستان، قوستاناي، پاۆلودار، سولتۇستىك قازاقستان، ۇلىتاۋ وبلىستارى مەن الماتى قالاسىندا تىركەلدى. ەڭ تومەن كورسەتكىشتەر اتىراۋ جانە الماتى وبلىستارىندا. ۇكىمەت باسشىسى اتاپ وتكەندەي، حالىقارالىق قارجى ينستيتۋتتارى الەمدىك ەكونوميكانىڭ ءوسۋ بولجامدارىن 2 ەسەگە جۋىق ازايتتى.
«الايدا، سىرتقى فاكتورلارعا قاراماستان، ءبىز ماكروەكونوميكالىق تۇراقتىلىقتى ساقتاپ قانا قويماي، ەكونوميكانىڭ ءوسۋ قارقىنىن قامتاماسىز ەتۋىمىز كەرەك. بازالىق سالالاردى ساپالى دامىتۋعا بارىنشا كوڭىل ءبولىپ، ەڭبەك كىرىستەرىنىڭ ءوسۋى، ساپالى جۇمىس ورىندارىن قۇرۋ ەسەبىنەن ازاماتتاردىڭ ءال-اۋقاتىن ارتتىرۋ جونىندە بەلسەندى شارالار قابىلدانۋى ءتيىس»، - دەدى ءاليحان سمايىلوۆ.
بۇل رەتتە پرەمەر-مينيستر قارجىلىق ءتارتىپتى كۇشەيتۋ ماڭىزدى ەكەنىن اتاپ ءوتتى، ويتكەنى باعدارلامالاردىڭ ءبىرقاتار اكىمشىلەرى بيۋدجەت قاراجاتىن يگەرمەگەن. وسىعان بايلانىستى ەڭ ۇلكەن الەۋمەتتىك-ەكونوميكالىق ناتيجەگە قول جەتكىزۋ ءۇشىن بيۋدجەت پارامەترلەرىنىڭ ساقتالۋىن جانە قاراجاتتىڭ ءتيىمدى ءبولىنۋىن قامتاماسىز ەتۋ قاجەت.
«تۇرعىن ۇي-كوممۋنالدىق شارۋاشىلىق ينفراقۇرىلىمىن جوندەۋ جانە رەكونسترۋكسيالاۋ بويىنشا جوسپارلانعان ينۆەستيسيالىق ءىس-شارالاردىڭ ورىندالۋى ەرەكشە باقىلاۋدا بولۋى ءتيىس. الەۋمەتتىك-ەكونوميكالىق دامۋدىڭ بارلىق جوسپارلانعان كورسەتكىشتەرىنە قول جەتكىزۋ كەرەك»، - دەپ قورىتىندىلادى ءسوزىن ءاليحان سمايىلوۆ.