بارلىعى سالىق تولەۋدەن جالتارعانى ءۇشىن جاۋاپقا تارتىلدى
2020 جىلى ەلىمىزدىڭ بەس دۇركىن چەمپيونى "Ertis" فۋتبول كومانداسى بەرەشەككە بەلشەسىنەن باتىپ، قارجىلاي قيىندىقتارعا تاپ بولۋى سالدارىنان پرەمەر-ليگا ويىندارىنان شىعارىلعان بولاتىن، دەپ حابارلايدى Almaty-akshamy.kz inbusiness.kz-كە سىلتەمە جاساپ.
وسىدان ەكى جىل بۇرىن جۇرگىزىلگەن اۋديت ناتيجەسى فۋتبول كلۋبىنىڭ 973،9 ملن تەڭگە سالىقتان جالتارعانىن انىقتادى. سونداي-اق، جاتتىقتىرۋشىلار مەن فۋتبولشىلار 379،5 ملن تەڭگە ايلىقتى ارتىق العان. تاعى 8 ملن تەڭگە قاعازدا بار، ءىس جۇزىندە جوق قىزمەتكەرلەرگە تولەنگەن.
سول جىلدىڭ باسىندا كلۋبتىڭ دامۋىنا بيۋدجەتتەن 1،8 ملرد تەڭگە ءبولىندى. تاعى 1،6 ملرد تەڭگەنى دەمەۋشىلەر بەرەدى دەگەن جوسپار بولدى. ءبىراق قارجىلاي كومەك كورسەتەتىن كومپانيا تەك 200 ملن تەڭگە بەرۋمەن شەكتەلدى.
مۇنداي جاعدايدىڭ بارلىعى كلۋب جۇمىسىن توقتاتۋعا الىپ كەلدى. ال زاڭسىز ارەكەتتەرگە بارعان باسشىلار سوت الدىندا جاۋاپقا تارتىلدى. بۇعان دەيىن بيۋدجەتكە 193 ملن تەڭگە مىندەتتى تولەمدى ۋاقىتىلى اۋدارماعان كلۋبتىڭ بۇرىنعى باسشىسى سەرىك ومارحانوۆ ءبىر جىلعا باس بوستاندىعىنان ايىرىلعان ەدى. جاقىندا كلۋبقا 2018-2019 جىلدارى جەتەكشىلىك ەتكەن ارداق تورسىقپايەۆ تا سوتتالدى. قازىناعا 300 ملن تەڭگە سالىقتى تولەمەگەن بۇرىنعى ديرەكتور 2 جىلىن تەمىر توردىڭ ارعى جاعىندا وتكىزەتىن بولدى. ال كۇنى كەشە 2016-2018 جىلدارى "Ertis" فۋتبول كلۋبىنىڭ باسشىسى قىزمەتىن اتقارعان جانايدار دۇيسەمبايەۆقا قاتىستى سوت ۇكىمى شىقتى. ونىڭ تۇسىندا شامامەن 250 ملن تەڭگە قارجى قازىناعا اۋدارىلماعان. ج.دۇيسەمبايەۆتىڭ كىناسى تولىعىمەن دالەلدەنىپ، 1 جىل 6 ايعا باس بوستاندىعىنان ايىرۋ جازاسى قولدانىلدى.