11 ساۋىردەن باستاپ قازاقستان قىرعىزستانمەن، وزبەكستانمەن جانە رەسەيمەن قۇرلىق شەكاراسى بويىنشا شەكتەۋلەردى الىپ تاستايدى، دەپ حابارلايدى Almaty-akshamy.kz COVID-19 تارالۋىنا جول بەرمەۋ جونىندەگى ۆاك-قا سىلتەمە جاساپ.
قازاقستان رەسپۋبليكاسىنىڭ اۋماعىندا كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا بۇل تۋرالى شەشىمدى 6 ساۋىردە قابىلدادى.
«ەرتەڭ، 11 ساۋىردەن باستاپ دوس-جاران، تۋىستارى مەن جاقىندارىمەن ۇزاق ۋاقىت بويى قاۋىشپاعان ادامدار وتكىزۋ بەكەتتەرىن شەكتەۋسىز كەسىپ وتە الادى. سونداي-اق، قازاقستاننىڭ مەملەكەتتىك شەكاراسىن اۋەقاتىناسى ارقىلى كەسىپ وتۋگە بەلگىلەنگەن بارلىق شەكتەۋلەر الىنادى»،-دەلىنگەن حابارلامادا.
ءبىراق ەستە ساقتاۋ كەرەك! پتر ادىسىمەن COVID-19 زەرتتەۋىنىڭ تەرىس ناتيجەسى بار انىقتامانى نەمەسە قازاقستاندىقتار مەن قازاقستان رەسپۋبليكاسى اۋماعىندا تۇرۋعا ىقتيارحاتى بار شەتەل ازاماتتارى، ۆاكسيناسيا پاسپورتتارىن ءوزارا تانۋى بار بولعان كەزدە شەتەل ازاماتتارى ۆاكسينالاۋ، ريەۆاكسينالاۋدىڭ تولىق كۋرسىنان وتكەندىگىن راستايتىن قۇجات/ءتولقۇجاتتى مىندەتتى تۇردە ۇسىنۋ جونىندەگى تالاپ ساقتالادى.