اباي اتىنداعى قازاق ۇلتتىق وپەرا جانە بالەت تەاترىندا ونەرسۇيەر قاۋىم ءۇشىن ماڭىزدى وقيعا بولدى. ەڭسەلى عيمارات ىشىنەن كسرو حالىق ءارتيسى، كسرو جانە قازاق كسر مەملەكەتتىك سىيلىعىنىڭ لاۋرەاتى، سوسياليستىك ەڭبەك ەرى، پروفەسسور ەرمەك بەكمۇحامەد ۇلى سەركەبايەۆ اتىنداعى كامەرالىق زال اشىلدى، دەپ حابارلايدى Almaty-akshamy.kz.
سالتاناتتى اشىلۋعا كسرو حالىق ءارتيسى بيبىگۇل تولەگەنوۆا جانە الىبەك دىنىشيەۆ قاتىسىپ، ەرمەك سەركەبايەۆ تۋرالى لەبىزدەرىمەن ءبولىستى. ءانشىنىڭ ەشكىمگە ۇقسامايتىن ءتۋابىتتى دارىنى تۋرالى وي تولعاپ، ادامدىق كەلبەتى جايىندا دا بايانداپ، جىلى ەستەلىكتەر ايتىپ بەردى.
ەرمەك سەركەبايەۆ كوزى تىرىسىندە «باريتونداردىڭ كورولى» جانە «كەڭەس وداعىنىڭ ۇزدىك فيگاروسى» دەگەن جوعارى مارتەبە يەلەنىپ، تىڭدارماندارىنىڭ ىقىلاسىنا بولەنگەن.
ءيا، ايگىلى وپەرا ءانشىسى، اكتەر، ۇستاز قازاق كلاسسيكالىق ونەرىنىڭ دامۋىنا وراسان زور ۇلەس قوسقان. ونىڭ ەسىمى تەك قازاقستاندا عانا ەمەس، الەم ساحنالارىندا ايتىلدى. ەرمەك سەركەبايەۆ دۇنيە ءجۇزىنىڭ ەڭ ۇزدىك دەگەن 50-دەن استام ساحناسىندا ونەر كورسەتكەن. سوڭىنا شىعارماشىلىق مول مۇرا قالدىردى. ەلىمىزدىڭ تالانتتى انشىلەرىنىڭ الىپ شوعىرىن تاربيەلەپ شىعاردى. تابيعي دارىنى مەن جانكەشتى ەڭبەگىنىڭ ارقاسىندا وپەرا ونەرىنىڭ شىڭىنا كوتەرىلدى. ونىڭ ورىنداعان تۋىندىلارى وتاندىق جانە الەمدىك كلاسسيكانىڭ التىن قورىن تولتىرىپ، شىعارماشىلىق جولىندا جۇرگەن تالاي بۋىنعا شابىت بەردى. سوندىقتان ەرمەك سەركەبايەۆتىڭ ەسىمى ۇلتتىق مۋزىكا مۇراسى تاريحىندا التىن ارىپتەرمەن جازىلىپ، ەسىمى حالىق جادىندا ماڭگى ساقتالادى.
جاڭادان اشىلعان كامەرالىق زالدىڭ قاق تورىنە ەرمەك سەركەبايەۆتىڭ ۇلكەن پورترەتى قويىلىپتى. جارىعى مول بولمەدە بولاشاقتا جاس وپەرا انشىلەرى ءان سالاتىن بولادى. ولارعا ارنالىپ شەبەرلىك ساباقتارى وتكىزىلەدى. ءتىپتى، قازاق مۋزىكا ونەرىنە ولشەۋسىز ەڭبەك سىڭىرگەن وزگە دە ونەر ادامدارى تۋرالى جاستارعا ۇلگى بولار ۇلاعاتتى ەستەلىكتەر ايتۋ كەشتەرى ۇيىمداستىرىلىپ تۇرماق.
كامەرالىق زالدىڭ اشىلۋ سالتاناتىندا ەرمەك سەركەبايەۆتىڭ شاكىرتتەرى – ق ر ەڭبەك سىڭىرگەن قايراتكەرى بولاتبەك بوكەنوۆ، دۋلات توقانوۆ، بولات قاناعاتوۆ ۇستازدارىنىڭ ەڭ جاقسى كورگەن اندەرىن شىرقادى.