ءانشى Air Astana اۋە كومپانياسىن ايىپتاپ وتىر.
قىزمەتكەرلەر جولاۋشىنىڭ ءوتىنىشىن تىركەپ، دەرەۋ جۇكتى ىزدەۋگە كىرىسكەن، دەپ حابارلايدى Almaty-akshamy.kz
ءانشى ەرلان كوكەيەۆ Air Astana اۋە كومپانياسىنا قىمبات اسپابىن جوعالتتى دەپ شاعىمداندى.
"Air Astana، نە بولىپ جاتقانىن تۇسىنسەم بۇيىرماسىن. سىزدەر ادەيى جاسايسىزدار عوي دەيمىن. مەن ءقازىر عانا وسكەمەننەن ۇشىپ كەلدىم. تاعى دا اسپابىممەن ماسەلە تۋىنداپ وتىر. گيتارام جوعالىپ كەتتى. ەڭ باستىسى گيتارا ءالى كەلمەدى دەپ مەنى الداپ وتىر. الدىن الا اسپاپ قالىپ قالماسىن دەپ ەسكەرتكەن بولاتىنمىن. ەشنارسە بولمايدى دەپ ايتقان بولاتىن. ءبىراق تاعى اسپابىم جوق. اسپابىمدى قايتارىڭدار”، – دەيدى ەرلان كوكەيەۆ.
وقيعاعا قاتىستى Air Astana اۋە كومپانياسىنىڭ وكىلدەرى تۇسىنىكتەمە بەردى.
"25 ماۋسىم كۇنى وسكەمەن-الماتى باعىتى بويىنشا KS302 رەيسىن ورىندايتىن ۇشاق قونعاننان كەيىن جولاۋشى ەرلان كوكەيەۆ الماتى اۋەجايىنداعى "جوعالعان جۇكتەر" بولىمىنە جۇگىنگەن. ول گيتاراسىن جۇكتەردىڭ اراسىنان تاپپاعانىن حابارلاعان. قىزمەتكەرلەر جولاۋشىنىڭ ءوتىنىشىن تىركەپ، دەرەۋ جۇكتى ىزدەۋگە كىرىستى. ءبىز گيتارانى تابۋ ءۇشىن بار كۇش-جىگەرىمىزدى سالىپ جاتىرمىز"، – دەدى اۋە كومپانياسىنىڭ وكىلدەرى.
بۇعان دەيىن Air Astana ۇشاعى بەلگىلەنگەن ۋاقىتتان 7 ساعات ەرتە ۇشىپ كەتتى دەگەن دەپۋتات يرينا سميرنوۆانىڭ اۋە كومپانياسىن سوتقا بەرەتىنى تۋرالى حابارلاعانبىز.