بۇگىن قازاقستاننىڭ تاريحىندا تۇڭعىش رەت اۋىل اكىمدەرىن سايلاۋ ءوتىپ جاتىر.
بۇل تۋرالى ءماجىلىس دەپۋتاتى ەرلان سايروۆ ءوزىنىڭ Facebook پاراقشاسىندا جازدى، دەپ حابارلايدى Almaty-akshamy.kz
«قۇرمەتتى دوستار! بۇگىن قازاقستاننىڭ ساياسي تاريحىندا ءمانى زور، ماعىناسى تەرەڭ ءىس-شارا بولىپ جاتىر! ساياسي ارەنادا ءبىرىنشى رەت اۋداندىق دەڭگەيدەگى اۋىل، كەنت، قالا اكىمدەرىنىڭ تىكەلەي سايلاۋى وتۋدە. رەسپۋبليكانىڭ 14 وبلىسىنىڭ 176 اۋدانىندا 730 اۋىل اكىمى سايلانۋدا، جىلدىڭ اياعىنا دەيىن 775 اكىم سايلانادى دەپ كۇتىلۋدە. بۇل - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ساياسي رەفورمالارىنىڭ پراكتيكالىق كورىنىسى! ەلىمىزدە بىرتە-بىرتە، ەۆوليۋسيالىق جولمەن قوعامدىق-ساياسي وزگەرىستەر بولىپ جاتىر!» دەپ جازدى دەپۋتات.
رەسپۋبليكا بويىنشا سايلاۋعا قاتىسۋ ءۇشىن 2582 ادام كانديدات رەتىندە ۇسىنىلىپ، 2297(88،9%) تىركەۋدەن ءوتتى. سايلاۋعا ەلىمىزدە تىركەلگەن بارشا پارتيالار قاتىسۋدا. 878 (38،2%) ۇمىتكەردى پارتيالار ۇسىنۋدا. كانديداتتاردىڭ باسىم كوپشىلىگى 1419 (61،8%) ءوزىن-وزى ۇسىنۋشىلار. ازاماتتار بۇل سايلاۋدى ءوزىنىڭ ازاماتتىق پوزيسياسىن بىلدىرۋگە ناقتى مۇمكىندىك ەكەندىگىن تۇسىنۋدە. قوعامدىق-ساياسي رەفورمالار ايماقتاردا ءوتۋى ءتيىس، ويتكەنى قازاقستان ايماقتاردان تۇرادى.
«مەملەكەت باسشىسى ق.توقايەۆ اتاپ وتكەندەي، «اۋىل اكىمدەرىنىڭ سايلاۋى - بىزدە دەموكراتيا دامىتۋداعى ماڭىزدى قادام». بۇل رەفورمالار مەملەكەت اپپاراتىنىڭ اۋدان، اۋىل دەڭگەيىندەگى جاۋاپكەرشىلىكتى جىكتەۋدى جۇيەلەۋى ءتيىس. اتالعان قادام ازاماتتاردىڭ، قوعامنىڭ ساياسي مادەنيەتىن ارتتىرا وتىرىپ، ەلىمىزدە ساياسي پليۋراليزم پرينسيپتەرىن ارتتىرۋعا سەپتىگىن تيگىزەرى ءسوزسىز. Nur Otan پارتياسى بۇل سايلاۋدىڭ تازا، ادال وتۋىنە مۇددەلى! باتىس الەمىنىڭ قارىشتى دامۋىنىڭ باستى تريگگەرىنىڭ ءبىرى - جەرگىلىكتى ءوزىن-وزى باسقارۋ پرينسيپتەرى ەكەندىگى بەلگىلى. بۇل سايلاۋ قازاقستاندا وسى ءوزىن-وزى باسقارۋ پرينسيپتەرىنىڭ العىشارتى بولىپ تابىلادى. سونىمەن بىرگە، تاۋەلسىزدىك جىلدارى حالىق ءبىرىنشى رەت جاپپاي وزدەرىنىڭ اكىمدەرىن تىكەلەي سايلاپ الۋعا قولى جەتىپ وتىر. وتە ۇلكەن پروگرەسسيۆتى قادام! ءبىز تاريحي وقيعاعا كۋاگەر بولۋدامىز. العا، قازاقستان!» - دەگەن جازبا جاريالادى ەرلان سايروۆ.