ءماجىلىس ءتوراعاسى ەرلان قوشانوۆ ازاپتاۋلارعا قاتىستى زاڭسىز ارەكەت جاساعان پوليسەيلەر جاۋاپسىز قالمايدى دەپ مالىمدەدى.
ءماجىلىستىڭ جالپى وتىرىسىنان كەيىن تىلشىلەردىڭ ساۋالىنا جاۋاپ بەرگەن ءماجىلىس سپيكەرى قاڭتار وقيعاسىنا قاتىستى تەرگەۋ جۇمىستارى دەپۋتاتتاردىڭ باستى نازارىندا ەكەنىن ايتتى.
– زاڭناما جانە سوت كوميتەتى الماتى، تاراز، تالدىقورعان قالالارىنا شىعىپ، كەزدەسۋ وتكىزدى. تەرگەۋ يزولياتورىنا ۇستالعان ازاماتتارمەن، ولاردىڭ اتا-انالارىمەن، قورعاۋشىلارىمەن كەزدەسىپ زەرتتەدى. كۇمان تۋعىزاتىن ماسەلەلەردىڭ ءبارىن پروكۋراتۋرا ورگاندارىنا بەردى. بۇگىندە دەپۋتاتتار وسى ماسەلەنى باقىلاپ وتىر. تەرگەۋ ءجۇرىپ جاتىر، تەرگەۋ امالدارى اياقتالعان سوڭ باعاسى بەرىلەدى. ەگەر پوليسيا قىزمەتكەرلەرى زاڭسىز ارەكەتكە بارعان بولسا، وندا جازاعا تارتىلادى، - دەدى ق ر پارلامەنتى ءماجىلىسىنىڭ ءتوراعاسى ەرلان قوشانوۆ.