قازاقستان رەسپۋبليكاسىنىڭ مەملەكەتتىك كەڭەسشىسى ەرلان ءقاريننىڭ توراعالىعىمەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ كەزەكتى وتىرىسى ءوتتى، دەپ حابارلايدى Almaty-akshamy.kz akorda.kz سىلتەمە جاساپ.
وتىرىستا مەملەكەتتىك كوميسسيانىڭ عىلىمي جانە باسپا قىزمەتىنىڭ ناتيجەلەرى قارالدى، ارحيۆتەردەگى زەرتتەۋلەردەن جينالعان ماتەريالدار زەردەلەندى، ەلەكتروندىق پورتالدىڭ جۇمىسى تۋرالى اقپارات بەرىلدى.
سونداي-اق وڭىرلىك كوميسسيالاردىڭ جۇمىسى تۋرالى ەسەپ تىڭدالىپ، ولاردىڭ عىلىمي جيناقتارىن دايىنداۋ جونىندەگى جوبالاردىڭ ىسكە اسىرىلۋ بارىسى قارالدى.
سونىمەن قاتار جيىندا مەملەكەتتىك كوميسسيا مۇشەلەرى ارحيۆتەردە جۇرگىزىلگەن زەرتتەۋ جۇمىستارى بارىسىندا تابىلعان، جازۋشى ءارى اقىن جۇسىپبەك ايماۋىتوۆ جازدى دەلىنگەن «ءازىر ولمەيمىن» («تەز ولمەن») شىعارماسىن تانىستىردى. ول پرەزيدەنت ءارحيۆىنىڭ عىلىمي-ىزدەستىرۋ جۇمىستارى كەزىندە تابىلعان بولاتىن. پرەزيدەنت ءارحيۆىنىڭ ديرەكتورى ءا. مۇستافينا شىعارمانىڭ قالاي تابىلعانى جانە وعان جۇرگىزىلگەن زەرتتەۋ جۇمىستارى جايىندا ايتتى. اتالعان شىعارمانى فيلولوگتار مەن ادەبيەتتانۋشىلار تاعى دا زەرتتەيتىن بولادى.
وتىرىس قورىتىندىسى بويىنشا عىلىمي-زەرتتەۋ قىزمەتىن جالعاستىرۋعا، وڭىرلىك كوميسسيالاردىڭ ماتەريالدارىن شىعارۋدى جۇيەلەندىرۋگە، جابىق قورلاردىڭ ماتەريالدارىن سيفرلاندىرۋ جانە قۇپياسىزداندىرۋ جونىندەگى جۇمىستى قامتاماسىز ەتۋگە باعىتتالعان تاپسىرمالار بەرىلدى.